ICC T20 Rankings: टीम इंडियाचा स्टार फलंदाज असणाऱ्या सूर्यकुमार यादवने ताज्या ICC T20 क्रमवारीत दोन स्थानांनी झेप घेतली आहे. सूर्यकुमारने 2 ऑगस्ट रोजी वेस्ट इंडिजविरुद्ध खेळल्या गेलेल्या सामन्यात 76 धावा केल्या होत्या. त्याचाच त्याला रँकिंगमध्ये फायदा झाला.
दरम्यान, सूर्यकुमार यादव (Suryakumar Yadav) आणि पाकिस्तानचा कर्णधार बाबर आझम यांच्यातील अंतर आता फक्त दोन रेटिंग गुणांचे उरले आहे. बाबर आझम (Babar Azam) टी-20 फलंदाजी क्रमवारीत पहिल्या क्रमांकावर कायम आहे. सूर्यकुमारने ताज्या क्रमवारीत पाकिस्तानच्या मोहम्मद रिझवान आणि दक्षिण आफ्रिकेच्या एडन मार्करामला मागे टाकले आहे.
दुसरीकडे, बाबर आझमचे 818 रेटिंग गुण आहेत, तर सूर्यकुमारचे 816 रेटिंग गुण आहेत. टॉप 10 टी-20 फलंदाजांमध्ये दुसरा कोणताही भारतीय नाही. इंग्लंडचा (England) डेव्हिड मलान पाचव्या क्रमांकावर कायम आहे.
शिवाय, इशान किशन 14 व्या क्रमांकावर तर कर्णधार रोहित शर्मा 16 व्या क्रमांकावर कायम आहे. लोकेश राहुलचाही टॉप-20 फलंदाजांमध्ये समावेश आहे, जो 20 व्या स्थानावर कायम आहे. मात्र श्रेयस अय्यरला एक स्थान गमवावे लागले असून तो 24 व्या स्थानावरुन 25 व्या स्थानावर घसरला आहे.
त्याचबरोबर, विराट कोहलीही एका स्थानाच्या नुकसानासह 28 व्या क्रमांकावर पोहोचला आहे. सूर्यकुमार यादवने अलिकडच्या काळात टी-20 आंतरराष्ट्रीय सामन्यांमध्ये शानदार प्रदर्शन केले आहे. त्याचाच परिणाम त्याच्या क्रमवारीवरही दिसून आला. या मालिकेतील शेवटच्या दोन सामन्यांनंतर सूर्यकुमार यादव बाबर आझमलाही मागे टाकू शकतो.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
