Rohit Sharma: 'वर्ल्डकपमध्ये शर्मा अन् कोहलीही करणार बॉलिंग...', कर्णधार रोहितचं मोठं भाष्य

Rohit Sharma said Hopefully he and Virat Kohli can bowl in Cricket World Cup 2023:

आशिया चषक 2023 स्पर्धेसाठी भारतीय क्रिकेट नियामक मंडळाच्या (BCCI) निवड समीतीने सोमवारी (21 ऑगस्ट) 17 जणांच्या भारतीय संघाची घोषणा केली आहे. यावेळी पत्रकार परिषदेसाठी भारतीय संघाचा कर्णधार रोहित शर्मा आणि निवड समितीचा अध्यक्ष अजित अगरकर उपस्थित होते. त्यांनी अनेक विषयांवर भाष्य केले आहे.

दरम्यान, भारतीय संघासाठी एक मोठी समस्या अशी आहे की भारताच्या पहिल्या 5 फलंदाजांपैकी कोणीही पार्टटाईम गोलंदाजी फारशी करताना दिसत नाही. याबद्दल रोहित आणि अगरकर यांनी पत्रकार परिषदेत गमतीशीर उत्तर दिले आहे.

रोहित म्हणाला, 'पण आशा आहे की शर्मा आणि कोहली वर्ल्डकपमध्ये गोलंदाजीत हात आजमावतील.'

रोहितच्या या वाक्यावर प्रतिक्रिया देताना अजित अगरकर म्हणाला, 'हो, आम्ही त्यांचे मन वळवले आहे.'

रोहित आणि विराट कोहली यांनी यापूर्वी गोलंदाजी केली आहे. पण गेल्या काही काळात ते फारशी गोलंदाजी करताना दिसलेले नाही. रोहितने गोलंदाजी करताना कसोटीत 2 विकेट्स, वनडेत 8 विकेट्स आणि आंतरराष्ट्रीय टी20 क्रिकेटमध्ये 1 विकेट घेतली आहे. तसेच विराटने वनडे आणि आंतरराष्ट्रीय टी20 क्रिकेटमध्ये प्रत्येकी 4 विकेट्स घेतल्या आहेत.

दरम्यान, आशिया चषकासाठी निवडण्यात आलेल्या भारतीय संघात जसप्रीत बुमराह, कुलदीप यादव, मोहम्मद सिराज, मोहम्मद शमी, प्रसिद्ध कृष्णा, शार्दुल ठाकूर या गोलंदाजांचा समावेश आहे. तसेच हार्दिक पंड्या, रविंद्र जडेजा आणि अक्षर पटेल हे अष्टपैलू खेळाडूही संघात आहेत.

मात्र, चकीत करणारी गोष्ट अशी की फिरकीपटू युजवेंद्र चहलला या संघातून वगळण्यात आले आहे. याबद्दल रोहितने म्हटले आहे की संघात 17 खेळाडूंसाठीच जागा होती. तसेच चहलसाठी अद्याप वर्ल्डकपसाठी दरवाजे बंद झालेले नाहीत.

आशिया चषकासाठी भारतीय संघ - रोहित शर्मा (कर्णधार), शुभमन गिल, विराट कोहली, श्रेयस अय्यर, केएल राहुल, हार्दिक पंड्या, रविंद्र जडेजा, जसप्रीत बुमराह, कुलदीप यादव, मोहम्मद सिराज, मोहम्मद शमी, इशान किशन, शार्दुल ठाकूर, अक्षर पटेल, सूर्यकुमार यादव, तिलक वर्मा, प्रसिद्ध कृष्णा.

राखीव खेळाडू - संजू सॅमसन