भारतातील प्रतिष्ठीत देशांतर्गत स्पर्धा रणजी ट्रॉफीचा 2023-24 चा हंगाम आता अखेरच्या टप्प्यात आहे. आता २ मार्चपासून या हंगामातील उपांत्य फेरीला सुरुवात होणार आहे. या हंगामातील अंतिम चार संघ निश्चित झाले आहेत. विदर्भ, मध्य प्रदेश, मुंबई आणि तमिळनाडू या चार संघांनी उपांत्य फेरीत धडक मारली आहे.
23 ते 27 फेब्रुवारी दरम्यान रणजी ट्रॉफी 2023-24 हंगामातील उपांत्यपूर्व फेरी पार पडली. या फेरीत विदर्भाने कर्नाटकचा 127 धावांनी पराभव करत उपांत्य फेरीत प्रवेश केला.
तसेच मुंबई आणि बडोदा यांच्यातील सामना अनिर्णत राहिला, मात्र मुंबईने पहिल्या डावात घेतलेल्या आघाडीमुळे उपांत्य फेरीत प्रवेश मिळवला आहे.
तमिळनाडूने सौराष्ट्रला उपांत्यपूर्व फेरीत एक डाव आणि 33 धावांनी पराभूत केले, तर मध्य प्रदेशने आंध्र प्रदेशविरुद्ध अवघ्या 4 धावांनी रोमांचक विजय मिळवत उपांत्य फेरी गाठली.
रणजी ट्रॉफी 2023-24 स्पर्धेतील उपांत्य फेरीतील सामने 2 ते 6 मार्च दरम्यान होणार आहे. या फेरीतील पहिला सामना विदर्भ विरुद्ध मध्य प्रदेश संघात नागपूरमधील विदर्भ क्रिकेट असोसिएशन स्टेडियमवर होणार आहे.
तसेच दुसरा सामना मुंबई विरुद्ध तमिळनाडू संघात मुंबईमधील बीकेसी ग्राऊंडवर होणार आहे. या दोन्ही सामन्यांना 2 मार्च रोजी सकाळी 9.30 वाजता सुरुवात होणार आहे.
या दोन्ही सामन्यातील विजेते संघ 10 ते 14 मार्चदरम्यान होणाऱ्या अंतिम सामन्यात खेळणार आहेत.
रणजी ट्रॉफीच्या सामन्यांचे थेट प्रक्षेपण जिओ सिनेमा ऍप आणि वेबसाईटवर केले जात आहे.
2 ते 6 मार्च 2024
विदर्भ विरुद्ध मध्य प्रदेश - विदर्भ क्रिकेट असोसिएशन, नागपूर (वेळ - स. 9.30 वा.)
मुंबई विरुद्ध तमिळनाडू - बीकेसी ग्राऊंड, मुंबई (वेळ - स. 9.30 वा.)
अंतिम सामना - 10 ते 14 मार्च 2024
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
