Pondicherry Inter State T20 Warm-Up Matches: पुदुचेरीतील आंतरराज्य टी-20 क्रिकेट सराव स्पर्धेत शनिवारी गोव्याचे फलंदाज लक्षवेधक ठरले, मात्र गोलंदाज अपयशी ठरल्यामुळे त्यांना पराभव पत्करावा लागला. झारखंडने सामना सहा विकेट राखून जिंकला.
गोव्याने नाणेफेक जिंकून प्रथम फलंदाजी स्वीकारली. त्यांनी ५ बाद १९० अशी आव्हानात्मक धावसंख्या उभारली. ईशान गडेकर (६५), सुयश प्रभुदेसाई (४७), तुनीष सावकार (४१) यांची आक्रमक फलंदाजी यामुळे गोव्याच्या डावाला बळकटी आली.
ईशानने अर्धशतक नोंदविताना नव्याने संघात दाखल झालेला महाराष्ट्राचा राहुल त्रिपाठी (१५) याच्यासमवेत ४३ धावांची सलामी दिली, नंतर ईशान व सुयश यांनी दुसऱ्या विकेटसाठी ७१ धावांची भागीदारी केली.
तुनीषने तुफानी फलंदाजी करताना अवघ्या १४ चेंडूंतील खेळीत चार चौकार व तीन षटकार मारले. झारखंडने सामना आठ चेंडू राखून सामना जिंकताना ४ बाद १९१ धावा केल्या.
गोव्याचा संभाव्य सीनियर क्रिकेट संघ मोसमपूर्व सरावासाठी सध्या पुदुचेरीत आहे. तेथे संघ स्पर्धा खेळणार असून शिबिरही तेथेच होईल.
संक्षिप्त धावफलक
गोवा : २० षटकांत ५ बाद १९० (ईशान गडेकर ६५- ४१ चेंडू, ८ चौकार, २ षटकार, राहुल त्रिपाठी १५, सुयश प्रभुदेसाई ४७- ३२ चेंडू, ७ चौकार, दर्शन मिसाळ ११, दीपराज गावकर नाबाद ५, तुनीष सावकार ४१- १४ चेंडू, ४ चौकार, ३ षटकार, कश्यप बखले नाबाद २, बालकृष्ण ४-०-४०-२, रवी यादव ४-०-२४-३) पराभूत
वि. झारखंड : १८.२ षटकांत ४ बाद १९१ (सौरभ तिवारी २३, विकास विशाल ४४- २३ चेंडू, ५ चौकार, २ षटकार, आयुष भारद्वाज नाबाद ५०- ३३ चेंडू, २ चौकार, ३ षटकार, आदित्य सिंग २३, पंकज कुमार नाबाद ३२, लक्षय गर्ग ४-०-४०-२, हेरंब परब २-०-२२-०, फेलिक्स आलेमाव ३-०-३१-१, वेदांत नाईक ३-०-३६-०, सुयश प्रभुदेसाई ४-०-३५-०, दर्शन मिसाळ २.२-०-२३-०).
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
