IPL 2024 Players Auction, Pat Cummins:
दुबईतील कोका-कोला एरिनामध्ये इंडियन प्रीमीयर लीग 2024 स्पर्धेसाठी मंगळवारी (19 डिसेंबर) लिलाव होत आहे. या लिलावात ऑस्ट्रेलियाच्या अनेक खेळाडूंची नावे चर्चेत होती. यातील एक नाव म्हणजे वर्ल्डकप 2023 विजेता कर्णधार पॅट कमिन्स.
वेगवान गोलंदाज पॅट कमिन्सने या लिलावात इतिहास घडवला आहे. तो आयपीएल लिलावातील सर्वात महागड्या खेळाडूंपैकी एक ठरला. त्याला सनरायझर्स हैदराबादने 20.50 कोटी रुपयांना खरेदी केले आहे. त्यामुळे साधारण दुपारी 3 वाजेपर्यंत तो आयपीएलच्या इतिहासातील सर्वात महागडा खेळाडू होता.
त्यामुळे कमिन्सने इंग्लंडचा अष्टपैलू सॅम करनचा विक्रम मोडला आहे. सॅम करनला गेल्यावर्षी म्हणजेच आयपीएल 2023 लिलावात 18.50 कोटी रुपयांना पंजाब किंग्सने खरेदी केले होते. त्यावेळी तो सर्वात महागडा खेळाडू ठरला होता. पण एकाच वर्षांनंतर त्याचा हा विक्रम कमिन्सने मोडला आहे.
कमिन्सची आयपीएल लिलावात महागडा ठरण्याची ही पहिलीच वेळ नाही. त्याला 2020 आयपीएल लिलावातही 15.50 कोटी रुपयांना कोलकाता नाईट रायडर्सने संघात घेतले होते. दरम्यान, कमिन्स 2023 आयपीएल हंगामात खेळला नव्हता.
कमिन्सने नुकतेच ऍशेस, कसोटी चॅम्पियनशीप आणि वर्ल्डकप 2023 स्पर्धा कर्णधार म्हणून जिंकली आहे. तसेच त्याची घातक वेगवान गोलंदाजी आणि खालच्या फळीत फलंदाजीमध्ये योगदान देण्याची क्षमता त्याला खास बनवते. त्यामुळे या ऑस्ट्रेलियन खेळाडूसाठीही फ्रँचायझी मोठ्या रक्कमेची बोली लावतील अशी चर्चा यापूर्वीच होती. अखेर ही चर्चा खरी ठरली आहे.
कमिन्सने आयपीएलमध्ये आत्तापर्यंत 42 सामने खेळले असून 45 विकेट्स घेतल्या आहेत. तसेच 379 धावा केल्या आहेत.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
