US Open 2023: जोकोविचने रचला इतिहास, मेदवेदेवला पराभूत करत जिंकले 24 वे ग्रँडस्लॅम

Novak Djokovic won 24th Grand Slam:

सार्बियाचा दिग्गज टेनिसपटू नोवाक जोकोविचने रविवारी इतिहास रचला आहे. त्याने अमेरिकन ओपन 2023 स्पर्धेतील पुरुष एकेरीच्या अंतिम सामन्यात तिसऱ्या मानांकित डॅनिल मेदवेदेवला पराभूत करत विजेतेपद पटकावले. हे त्याचे कारकिर्दीतील 24 वे ग्रँडस्लॅम विजेतेपद ठरले.

त्यामुळे जोकोविचने एकेरीत सर्वाधिक ग्रँडस्लॅम जिंकण्याच्या मार्गारेट कोर्टच्या 24 ग्रँडस्लॅम विजेतेपदांच्या विक्रमाशी बरोबरी केली आहे. जोकोविच सर्वाधिक ग्रँडस्लॅम जिंकणारा पुरुष टेनिसपटू आहे.

जोकोविचने रविवारी मेदवेदेवला 6-3 7-6(5) 6-3 अशा फरकाने तीन सेटमध्ये पराभूत केले आणि चौथ्यांदा अमेरिकन ओपनच्या ट्रॉफीवरही नाव कोरले. यापूर्वी त्याने 2011, 2015 आणि 2018 साली अमेरिकन ओपन स्पर्धा जिंकली आहे.

सामन्यानंतर जोकोविच म्हणाला, 'मला माहित नाही, मी कुठून सुरुवात करू, कारण हेच माझ्यासाठी जग आहे. मी माझे बालपणीचे स्वप्न जगत आहे. खेळाच्या सर्वोच्च स्तरावर स्पर्धा करत आहे, ज्या खेळाने माझ्य कुटुंबाला खूप काही दिले आहे.'

'90च्या दशकात आमच्या देशात खूप युद्ध झाली आणि माझ्या कुटुंबाने खूप त्यागही केला. त्यांनी मला हा महागडा खेळही खेळू दिला. मी या खेळाच्या प्रेमात पडलो, जो खेळ माझ्या कुटुंबातील कोणीही यापूर्वी खेळला नव्हता. माझ्या पालकांनी दाखवलेला हा अविश्वसनीय विश्वास होता. ही ट्रॉफी माझ्या मुलांसाठी आणि माझ्या टीमसाठी आहे.'

तसेच जोकोविचने असेही म्हटले की 'इतिहास घडवणे हे खूप विशेष आणि शानदार आहे. मी ७-८ वर्षाचा असताना माझे स्वप्न होते की जगातील सर्वोत्तम खेळाडू बनायचे आणि विम्बल्डन जिंकायचे. गेल्या काही वर्षात मला वाटते मला इतिहास घडवण्याची संधी होती आणि जर ती मिळत असेल, तर का घेऊ नये.'

याशिवाय त्याने प्रतिस्पर्धी मेदवेदेवचेही कौतुक केले. तसेच सामन्यानंतर मेदवेदेवनेही जोकोविच आणि त्याच्या टीमचे अभिनंदन केले.

दरम्यान सामन्याबद्दल सांगायचे झाल्यास जोकोविचने पहिला सेट सहज 6-3 अशा फरकाने जिंकला होता, पण मेदवेदेवने दुसऱ्या सेटमध्ये दमदार पुनरागमन करत हा सेट टायब्रेकरमध्ये नेला.

मात्र जोकोविचने टायब्रेकर 7-5 असा जिंकला आणि सामन्यातही आघाडी घेतली. तिसऱ्या सेटमध्येही जोकोविचने मेदवेदेवला फारशी संधी दिली नाही आणि सेट जिंकत सामनाही आपल्या नावावर केला.

जोकोविचची 24 ग्रँडस्लॅम

जोकोविचने त्याच्या कारकिर्दीत 4 अमेरिकन ओपन, 10 ऑस्ट्रेलियन ओपन, 3 फ्रेंच ओपन आणि 7 विम्बल्डन अशी मिळून एकूण 24 ग्रँडस्लॅम विजेतीपदे जिंकली आहेत.