आयपीएल २०२६ चा हंगाम सध्या आपल्या रंगात आला असून, दररोज क्रिकेटप्रेमींना नवनवीन चमत्कार पाहायला मिळत आहेत. नुकत्याच रायपूरमध्ये पार पडलेल्या रॉयल चॅलेंजर्स बेंगळुरू (RCB) आणि कोलकाता नाईट रायडर्स (KKR) यांच्यातील सामन्यात असाच एक प्रसंग घडला, ज्याची चर्चा आता जगभर होत आहे. केकेआरच्या मनीष पांडेने सीमारेषेवर घेतलेला एक अविश्वसनीय झेल पाहून प्रत्यक्ष 'किंग' कोहलीही अवाक झाला.
आरसीबीच्या डावातील १८ वे षटक सुरू असताना ही घटना घडली. टिम डेव्हिडने पाचव्या चेंडूवर एक जोरदार 'कट' शॉट मारला. चेंडू इतक्या वेगाने जात होता की तो थेट सीमारेपलीकडे जाईल असे वाटत होते. मात्र, पॉईंटवर तैनात असलेल्या मनीष पांडेने हवेत झेप घेत, गुरुत्वाकर्षणालाही आव्हान देणारा एक 'अशक्य' झेल टिपला. पांडेची ही चपळाई पाहून मैदानावरील प्रेक्षक आणि समालोचक काही क्षण स्तब्ध झाले.
मनीष पांडेचा हा पराक्रम पाहून नॉन-स्ट्राइकर एंडला उभ्या असलेल्या विराट कोहलीच्या चेहऱ्यावरील हावभाव पाहण्यासारखे होते. हा झेल टिपल्यानंतर कोहलीच्या तोंडून उत्स्फूर्तपणे ‘WOW’ शब्द बाहेर पडला. मैदानात कमालीची चुरस असूनही, विराटने खेळभावना दाखवत मनीष पांडेला मिठी मारली आणि त्याच्या या जबरदस्त फील्डिंगचे कौतुक केले. कोहलीचे हे दाद देणारे कृत्य सध्या सोशल मीडियावर चाहत्यांची मने जिंकत आहे.
सामन्याबद्दल बोलायचे झाले तर, केकेआरने प्रथम फलंदाजी करताना १९२ धावांचा डोंगर उभा केला होता. यामध्ये अंगकृष रघुवंशीच्या ७१ धावा आणि रिंकू सिंगच्या नाबाद ४९ धावांचा मोठा वाटा होता. मात्र, आरसीबीने हे लक्ष्य १९.१ षटकातच पूर्ण केले. विराट कोहलीने आपल्या बॅटची जादू दाखवत शानदार शतक झळकावले आणि संघाला ६ गडी राखून विजय मिळवून दिला. मनीष पांडेचा तो कॅच सामना फिरवणारा ठरला असता, पण कोहलीच्या जिद्दीपुढे केकेआरचे प्रयत्न अपुरे पडले.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.