South Africa vs India, 3rd ODI at Paarl, KL Rahul Record:
दक्षिण आफ्रिका विरुद्ध भारत संघात गुरुवारी (21 डिसेंबर) तिसरा आणि शेवटचा वनडे सामना खेळवण्यात आला. पार्लला झालेल्या या वनडे सामन्यात भारताने 78 धावांनी विजय मिळवला. या विजयासह भारताने वनडे मालिकाही 2-1 अशा फरकाने जिंकली.
याच सामन्यादरम्यान भारताचा यष्टीरक्षक फलंदाज आणि कर्णधार केएल राहुलने एका मोठ्या विक्रमाला गवसणी घातली आहे.
यावर्षी केएल राहुल भारतीय संघाकडून यष्टीरक्षक म्हणून खेळला आहे. दरम्यान या सामन्यात केएल राहुलने 21 धावांची खेळी केली. ही खेळी करताना त्याने 2023 वर्षात वनडेत 1000 धावांचा टप्पा पार केला आहे.
केएल 2023 वर्षात 27 वनडेत 66.25 च्या सरासरीने 1060 धावा केल्या आहेत. यामध्ये 2 शतके आणि 7 अर्धशतकांचा समावेश आहे. यातील 23 सामने तो पूर्णवेळ यष्टीरक्षक म्हणून खेळला असून 802 धावा केल्या आहेत.
दरम्यान, केएल राहुल एका वर्षात 1000 वनडे धावा पूर्ण करणारा भारताचा दुसराच यष्टीरक्षक आहे. त्याच्यापूर्वी एमएस धोनीने असा पराक्रम केला होता. धोनीनंतर तब्बल 14 वर्षांनी भारताच्या यष्टीरक्षक फलंदाजाने एका वर्षात 1000 धावा पूर्ण केल्या आहेत.
धोनीने 2007, 2008 आणि 2009 या तिन्ही वर्षी वनडेत 1000 धावांचा टप्पा ओलांडला होता. त्याने 2007 साली 37 सामन्यांत 1 शतकासह 1103 धावा केल्या होत्या. तसेच 2008 साली 29 सामन्यांत 1 शतकासह 1097 धावा त्याने केल्या होत्या, तर 2009 साली 29 वनडेत 2 शतके आणि 9 अर्धशतकांसह 1198 धावा केल्या होत्या.
दरम्यान, गुरुवारी झालेल्या सामन्याबद्दल सांगायचे झाले, तर भारताकडून संजू सॅमसनने 108 धावांची शतकी खेळी केली. तसेच तिलक वर्माने 52 धावांची अर्धशतकी खेळी केली, तर रिंकू सिंगने 38 धावा केल्या. भारतीय संघाने प्रथम फलंदाजी करताना 50 षटकात 8 बाद 296 धावा केल्या.
दक्षिण आफ्रिकेकडून गोलंदाजीत ब्युरान हेंड्रिक्सने सर्वाधिक 3 विकेट्स घेतल्या, तसेच नांद्रे बर्गरने 2 विकेट्स घेतल्या, तर लिझाद विल्यम्स, विआन मुल्डर आणि केशव महाराज यांनी प्रत्येकी 1 विकेट घेतली.
त्यानंतर 297 धावांच्या आव्हानाचा पाठलाग करताना दक्षिण आफ्रिकेचा संघ 45.5 षटकात 218 धावांवर सर्वबाद झाला. दक्षिण आफ्रिकेकडून टोनी डी झोर्झीने 81 धावांची खेळई केली, तर कर्णधार एडेन मार्करमने 36 धावा केल्या आणि हेन्रिक क्लासेनने 21 धावांची खेळी केली. याशिवाय कोणालाही 20 धावांचा टप्पा ओलांडता आला नाही.
भारताकडून गोलंदाजीत अर्शदीप सिंगने सर्वाधिक 4 विकेट्स घेतल्या. अवेश खान आणि वॉशिंग्टन सुंदर यांनी प्रत्येकी 2 विकेट्स घेतल्या. त्याचबरोबर मुकेश कुमार आणि अक्षर पटेल यांनी प्रत्येकी 1 विकेट घेतली.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
