India Pakistan World Cup 2027 schedule: वनडे वर्ल्ड कप 2027 चे वेळापत्रक जाहीर झाल्यानंतर भारत आणि पाकिस्तानच्या सामन्याची चर्चा पुन्हा एकदा रंगली आहे. दक्षिण आफ्रिका, झिम्बाब्वे आणि नामिबिया यांच्या यजमानपदाखाली होणाऱ्या या स्पर्धेला 2 ऑक्टोबरपासून सुरुवात होणार आहे. भारतीय संघ आपल्या मोहिमेची सुरुवात 7 ऑक्टोबर रोजी ऑस्ट्रेलियाविरुद्धच्या सामन्याने करणार आहे.
मात्र, चाहत्यांचे सर्वाधिक लक्ष 10 ऑक्टोबर रोजी होणाऱ्या भारत-पाकिस्तान सामन्याकडे असणार आहे. जोहान्सबर्ग येथे हा सामना होणार असून दोन्ही संघांना एकाच गटात स्थान देण्यात आले आहे. विशेष म्हणजे, स्पर्धेच्या रचनेनुसार भारत आणि पाकिस्तान यांच्यात केवळ एकच सामना होईल असे नाही; परिस्थिती जुळून आल्यास दोन्ही संघ तीन वेळाही आमनेसामने येऊ शकतात.
भारत आणि पाकिस्तान यांच्यातील पहिला सामना 10 ऑक्टोबर रोजी गटातील लढतीत होणार आहे. दोन्ही संघ एकाच गटात असल्याने हा सामना आधीच निश्चित आहे.
भारताच्या गटात ऑस्ट्रेलिया, पाकिस्तान, अफगाणिस्तान, झिम्बाब्वे आणि क्वालिफायरमधून येणारा एक संघ आहे. त्यामुळे स्पर्धेच्या सुरुवातीलाच भारत-पाकिस्तान सामना क्रिकेट चाहत्यांचे लक्ष वेधून घेणार आहे.
गटातील सामन्यांनंतर स्पर्धेची पुढील फेरी सुरू होईल. या टप्प्यावर भारत आणि पाकिस्तान दोन्ही संघ पात्र ठरले, तर पुन्हा एकदा त्यांची आमनेसामने येण्याची शक्यता निर्माण होईल.
दोन्ही गटांमधून अव्वल तीन संघ थेट पुढील फेरीत पोहोचतील. याशिवाय दोन्ही गटांमधील चौथ्या क्रमांकाच्या संघांपैकी चांगली कामगिरी करणाऱ्या एका संघाला पुढील फेरीत स्थान मिळेल. त्यामुळे भारत आणि पाकिस्तान दोन्ही संघांनी पात्रता मिळवल्यास दुसरा सामना होण्याची शक्यता आहे.
भारत-पाकिस्तानची तिसरी लढत होण्यासाठी दोन्ही संघांना स्पर्धेच्या बाद फेरीपर्यंत पोहोचावे लागेल. जर दोन्ही संघांनी सुपर-7 फेरीत चांगली कामगिरी करत उपांत्य फेरी गाठली, तर त्यांच्या क्रमवारीनुसार सेमीफायनलमध्ये सामना होऊ शकतो.
दुसरी शक्यता म्हणजे दोन्ही संघ वेगवेगळ्या उपांत्य सामन्यांत खेळतील आणि आपापले सामने जिंकतील. अशा परिस्थितीत 21 नोव्हेंबर रोजी होणाऱ्या अंतिम सामन्यात भारत आणि पाकिस्तान यांच्यात महामुकाबला पाहायला मिळू शकतो. म्हणजेच स्पर्धेच्या रचनेनुसार भारत-पाकिस्तान सामना तीन वेळा होण्याची कमाल शक्यता आहे. मात्र, त्यासाठी दोन्ही संघांना प्रत्येक टप्प्यावर पात्र ठरत पुढे जावे लागेल.
वनडे वर्ल्ड कपच्या इतिहासात भारताचा पाकिस्तानविरुद्धचा विक्रम चर्चेचा विषय राहिला आहे. आतापर्यंत विश्वचषकात दोन्ही संघांमध्ये आठ सामने झाले आहेत आणि या सर्व सामन्यांत भारताने विजय मिळवला आहे.
1992 च्या विश्वचषकापासून सुरू झालेल्या या सामन्यांमध्ये भारताने पाकिस्तानविरुद्ध आपले वर्चस्व कायम ठेवले आहे. 2023 च्या विश्वचषकातही दोन्ही संघ आमनेसामने आले होते. अहमदाबादमध्ये झालेल्या त्या सामन्यात भारताने पाकिस्तानचा सात विकेट्सनी पराभव केला होता.
आता 2027 च्या विश्वचषकात भारत आणि पाकिस्तान यांच्यातील पहिली लढत 10 ऑक्टोबरला होणार आहे. त्यानंतर स्पर्धेच्या पुढील टप्प्यांमध्ये दोन्ही संघ पात्र ठरले आणि निकालांचे समीकरण जुळले, तर चाहत्यांना आणखी एक किंवा दोन भारत-पाकिस्तान सामने पाहायला मिळू शकतात.
त्यामुळे 2027 च्या विश्वचषकात भारत-पाकिस्तानची टक्कर केवळ एका सामन्यापुरती मर्यादित राहण्याची शक्यता नाही. मात्र, तीन सामन्यांचे हे समीकरण पूर्णपणे दोन्ही संघांच्या पुढील फेरीतील पात्रतेवर आणि नॉकआउटमधील त्यांच्या स्थानावर अवलंबून असेल.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.