India vs Australia: भारत विरुद्ध ऑस्ट्रेलिया संघात गुरवारपासून अहमदाबादमधील नरेंद्र मोदी स्टेडियमवर कसोटी मालिकेतील चौथा सामना सुरू झाला आहे. या सामन्याच्या दुसऱ्या दिवशी ऑस्ट्रेलिया संघातील खेळाडूंनी दंडावर काळी पट्टी बांधली होती. यामागील कारण क्रिकेट ऑस्ट्रेलियाने स्पष्ट केले आहे.
गुरुवारी रात्री उशीरा ऑस्ट्रेलियाचा नियमित कर्णधार पॅट कमिन्सच्या आईचे निधन झाले. ऑस्ट्रेलियन खेळाडूंना ही दु:खद बातमी ऑस्ट्रेलियाचे प्रशिक्षक अँड्र्यू मॅकडोनल्ड यांनी दिली होती. त्याचमुळे कमिन्सच्या आईच्या सन्मानार्थ ऑस्ट्रेलियाचे खेळाडू दंडाला काळी पट्टी घालून शुक्रवारी मैदानात उतरले होते. या कृतीतून ऑस्ट्रेलियन संघाने शोक व्यक्त केला आहे.
समोर आलेल्या रिपोर्ट्सनुसार पॅट कमिन्सची आई मारिया गेल्या काही काळापासून ब्रेस्ट कॅन्सरशी लढा देत होत्या. त्यांची तब्येतही गेल्या काही दिवसात खालावली होती. अखेर त्यांनी गुरुवारी रात्री अखेरचा श्वास घेतला आहे.
कमिन्स या कठीण काळात त्याच्या घरी कुटुंबासोबत आहे. त्याच्या आईची तब्येत तीन आठवड्यांपूर्वी खालावल्याने तो भारताविरुद्धच्या कसोटी मालिकेतील दुसरा सामना संपल्यानंतर मायदेशी परतला होता. त्यानंतर त्याने या काळात कुटुंबाला प्राधान्य देत पुढील दोन कसोटी सामन्यांसाठी भारतात न परतण्याचा निर्णय घेतला होता. कमिन्सच्या या निर्णयाला क्रिकेट ऑस्ट्रेलियाने पाठिंबा दिला होता.
त्याच्या अनुपस्थितीत स्टीव्ह स्मिथने ऑस्ट्रेलियाचे नेतृत्व केले. दरम्यान, कमिन्स आता भारताविरुद्ध 17 मार्चपासून सुरू होणाऱ्या तीन सामन्यांच्या वनडे मालिकेसाठी ऑस्ट्रेलिया संघात परतू शकतो.
ऑस्ट्रेलियाने अहमदाबाद कसोटीत पहिल्या दोन्ही दिवशी वर्चस्व ठेवले आहे. नाणेफेक जिंकून प्रथम फलंदाजी करणाऱ्या ऑस्ट्रेलियाकडून उस्मान ख्वाजा आणि कॅमेरॉन ग्रीन यांनी शतके केली. ख्वाजाने 422 चेंडूत खेळताना 180 धावांची खेळी केली.
तसेच ग्रीनने 170 चेंडूत 114 धावांची खेळी केली. याशिवाय ऑस्ट्रेलियाच्या तळातील फलंदाजांनीही चांगली झुंज दिली. त्यामुळे ऑस्ट्रेलियाने दुसऱ्या दिवशी पहिल्या डावात सहज 450 धावा पार केल्या.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
दैनिक गोमन्तक आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, इन्स्टाग्राम, ट्विटर, शेअर चॅट आणि टेलिग्राम आम्हाला फॉलो करा. तसेच, दैनिक गोमन्तकच्या यूट्यूब चॅनेलला आजच सबस्क्राइब करा.
