IND vs NAM: "टीम इंडियाला झुकतं माप का?" टी-20 वर्ल्ड कपमध्ये वादाची ठिणगी!नामिबियाच्या कर्णधाराचा 'ICC'वर गंभीर आरोप

Namibia captain ICC allegation : टी२० विश्वचषक २०२६ च्या रणधुमाळीत आता मैदानाबाहेरील वादही रंगू लागले आहेत. गुरुवारी होणाऱ्या भारत विरुद्ध नामीबिया या सामन्यापूर्वी नामीबियाचा कर्णधार गेरहार्ड इरास्मस याने आयोजकांवर (ICC) पक्षपाताचे आरोप केले आहेत. भारताला सरावासाठी विशेष सवलती दिल्या जात असून नामीबियाला मात्र दुय्यम वागणूक मिळत असल्याचे त्याने म्हटले आहे.

सरावाच्या वेळापत्रकावरून आयसीसीवर निशाणा

इरास्मसने दिलेल्या माहितीनुसार, भारतीय संघाला रात्रीच्या वेळी (फ्लडलाईट्समध्ये) दोन सराव सत्रे देण्यात आली, तर नामीबियाला दोन्ही सराव सत्रे दिवसा देण्यात आली. विशेष म्हणजे नामीबियाने आपला शेवटचा सामना दिवसा खेळला होता, तरीही त्यांना रात्रीच्या प्रकाशात सराव करण्याची संधी नाकारण्यात आली.

"मला माहित नाही असं का घडतंय, पण भारताला रात्रीचा सराव मिळतोय आणि कॅनडासारख्या संघांनाही ती सोय उपलब्ध आहे. तुम्ही यातून जो अर्थ काढायचा तो काढा, पण आम्ही मैदानात आमच्या पद्धतीने (नामीबियन स्टाईलने) लढू," असे इरास्मसने टोमणे मारत स्पष्ट केले.

सुविधांचा अभाव

नामीबियामध्ये फ्लडलाईट्समध्ये खेळण्याच्या पायाभूत सुविधांची वानवा आहे. त्यामुळेच भारताविरुद्धच्या महत्त्वाच्या सामन्यापूर्वी रात्रीच्या प्रकाशात सराव करणे त्यांच्यासाठी तांत्रिकदृष्ट्या महत्त्वाचे होते. नामीबियाचे खेळाडू 'नेपाळ प्रीमियर लीग' किंवा 'ILT20' सारख्या स्पर्धांचा अपवाद वगळता फ्लडलाईट्समध्ये खेळण्यास सरावलेले नाहीत. अशा परिस्थितीत सरावासाठी समान संधी न मिळणे हे नामीबियासाठी मोठे आव्हान ठरू शकते.

नामीबियाची 'करो या मरो' स्थिती

नीदरलँड्सविरुद्धचा पहिला सामना गमावल्यानंतर नामीबियाची स्थिती कठीण झाली आहे. यानंतर त्यांना अमेरिका आणि पाकिस्तानचा सामना करायचा आहे. दुसरीकडे, अमेरिकेकडून धक्कादायक पराभव पत्करावा लागलेला भारतीय संघ आता कोणत्याही स्थितीत नामीबियाला हलक्यात घेण्याची चूक करणार नाही. नामीबियाकडे गमावण्यासारखे काही नसले, तरी आयसीसीच्या या नियोजनामुळे स्पर्धेतील पारदर्शकतेवर प्रश्नचिन्ह निर्माण झाले आहे.