महान फुटबॉलपटू पेले यांचा खेळ दैवी होता, प्रतिस्पर्धी बचावपटूंना गुंगारा देत गोल करण्याचे त्यांचे कसब एकमेवाद्वितीय होते. गोल नोंदविणाऱ्या पेले यांचे चित्र अजूनही डोळ्यांत साठलेले आहे, अशी प्रतिक्रिया भारताचे माजी फुटबॉल संघाचे कर्णधार ब्रह्मानंद शंखवाळकर यांनी श्रद्धांजली वाहताना दिली.
गोलरक्षक ब्रह्मानंद पद्मश्री, अर्जुन पुरस्कार सन्मानित असून सध्या ते गोवा फुटबॉल विकास मंडळाचे (जीएफडीसी) अध्यक्ष या नात्याने कार्यरत आहेत. जादुई खेळाने फुटबॉलचे सम्राट बनलेले पेले यांचे गुरुवारी वयाच्या 82व्या वर्षी निधन झाले.
``पेले यांचा खेळ अनुभवण्याचा आनंद काही औरच होता. मी चार वर्षांचा असतानाच पेले यांच्या फुटबॉल जादूने मोहित केले. मी फुटबॉल खेळण्यास सुरवात केली तेव्हा फक्त पेले हेच आदर्श होते. त्यांच्यामुळेच मी ब्राझील फुटबॉलच्या प्रेमात पडलो, ते आजतागायत कायम आहे. आमच्या काळात टीव्हीवरील फुटबॉलचे थेट प्रक्षेपण नव्हते, त्यामुळे चित्रित विश्वकरंडक सामने पाहिले, त्यातून पेले यांची फुटबॉलवरील हुकमत अनुभवता आली,`` असे ब्रह्मानंद म्हणाले.
पेले यांच्याबद्दल काही आठवणींना उजाळा देताना ब्रह्मानंद म्हणाले, ``1970 मधील मेक्सिकोत झालेल्या विश्वकरंडक स्पर्धेचे धावचे समालोचन ऐकण्यासाठी माझ्या थोरल्या भावांनी गॅरेजमधील कार गुपचूपपणे माडांच्या खाली खुल्या जागेत नेली होती, फक्त पेले यांच्या असामान्य खेळाची अनुभूती घेणे हाच त्यामागचा उद्देश होता. पेले नामक अवलियाचा आनंद लुटण्यासाठी भल्या पहाटे जागलो. पणजीतील सिने नॅशनलमध्ये जायंट्स ऑफ ब्राझील हा सिनेमा उत्कठतेने पाहिला.``
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
