FIFA Women World Cup 2023, Day Two Results: ऑस्ट्रेलिया आणि न्यूझीलंडमध्ये सुरु असलेल्या महिला फिफा वर्ल्डकप 2023 स्पर्धेचा शुक्रवारी दुसरा दिवस होता. दुसऱ्या दिवशी तीन सामने पार पडले असून दोन सामन्यांचे निकाल लागले, तर एक सामना बरोबरीत सुटला.
दुसऱ्या दिवशी नायजेरीया आणि कॅनडा संघात झालेला सामना बरोबरीत सुटला, तर स्वित्झर्लंडने फिलिपाईन्स संघाविरुद्ध 2-0 असा विजय मिळवला. तसेच स्पेनने कोस्टा रिकाला 3-0 अशा गोलफरकाने पराभूत केले.
ऑलिम्पिक चॅम्पियन कॅनडाला नायजेरियाने शेवटपर्यंत चांगली झुंज देताना गोल करण्याची संधी दिली नाही. नायजेरियासाठी गोलकिपर चिमका एनादोझी विजयाची हिरो ठरली. तिने चांगला बचाव करत कॅनडाला गोलपासून रोखले. त्यामुळे हा सामना 0-0 अशा फरकाने बरोबरीत सुटला.
दुसऱ्या दिवशीचा दुसरा सामना स्वित्झर्लंड विरुद्ध फिलिपाईन्स संघात झाला. या सामन्यात सुरुवातीला दोन्ही संघांनी एकमेकांना चांगली लढत दिली होती. पण संपुर्ण सामन्यात चेंडूवर सर्वाधिक ताबा स्वित्झर्लंडचा दिसून आला.
दरम्यान पहिला हाफ गोलशिवायच संपणार असे वाटत असतानाच 45 व्या मिनिटाला रोमाना बचमनने पेनल्टीवर गोल करत स्वित्झर्लंड संघाचे खाते उघडले. तसेच दुसऱ्या हाफमध्ये सामन्याच्या 64 व्या मिनिटाला सेरैना सेवेरिन प्युबेल हिने स्वित्झर्लंडसाठी दुसरा गोल नोंदवत आघाडी वाढवली. ही आघाडी स्वित्झर्लंडने अखेरपर्यंत कायम ठेवत सामना जिंकला.
ग्रुप सीमधील स्पेन आणि कोस्टारिका यांच्यात दुसऱ्या दिवसातील तिसरा सामना पार पडला. या सामन्यातील पहिला हाफ चांगलाच नाट्यपूर्ण ठरला. 21 व्या मिनिटाला कोस्टारिकाच्या वेलेरिया डेल कँपोने स्वयंगोल करत स्पेनचे खाते उघडले.
त्यावर स्पेनने पुढच्या 10 मिनिटात दोन गोल करत आघाडी 3-0 अशी केली. यानंतर कोस्टारिकाला पुनरागमन करता आले नाही आणि सामना गमवावा लागला. स्पेनकडून ऐताना बोनमतीने 23 व्या मिनिटाला आणि इस्टर गोन्झालेजने 27 व्या मिनिटाला गोल केला होता.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
