FIFA Women World Cup 2023: New Zealand vs Norway and Australia vs Ireland: फिफा महिला वर्ल्डकप 2023 स्पर्धेला ऑस्ट्रेलिया आणि न्यूझीलंड या देशांमध्ये 20 जुलै रोजी दणक्यात सुरुवात झाली. स्पर्धेच्या उद्धाटन सोहळ्यानंतर पहिल्या दिवशी न्यूझीलंड विरुद्ध नॉर्वे हा सामना ऑकलंडला इडन पार्कला पार पडला, तर ऑस्ट्रेलिया विरुद्ध आयर्लंड हा सामना सिडनीत पार पडला.
पहिल्याच दिवशी यजमानांनी विजयी सुरुवात केली आहे. न्यूझीलंडने नॉर्वेला 1-0 अशा गोल फरकाने, तसेच ऑस्ट्रेलियाने आयर्लंडला 1-0 अशा गोलफरकाने पराभूत केले.
सलामीचा सामना न्यूझीलंड विरुद्ध नॉर्वे यांच्यात झाला. पण याच सामन्याच्या काही तास आधी ऑकलंडमध्ये गोळीबार झाल्याची घटना घडली होती. या घटनेत गोळीबार करणाऱ्या व्यक्तीसह आणखी दोन नागरिकांचा मृत्यू झाला.
ही घटना नॉर्वे संघ थांबलेल्या हॉटेलच्या काही अंतरावरच घडल्याने अनेकांना धक्का बसला होता. पण त्याचा परिणाम स्पर्धेवर झाला नाही आणि सामना 42 हजारांहून अधिक प्रेक्षकांच्या उपस्थितीत वेळेवर सुरू झाला.
दरम्यान पहिल्या सामन्यात पहिल्या हाफमध्ये न्यूझीलंड आणि नॉर्वे दोन्ही संघांना गोल करता आला नव्हता. पण दुसऱ्या हाफच्या सुरुवातीलाच सामन्याच्या 48 व्या मिनिटाला न्यूझीलंडकडून हन्नाह विलकिन्सनने गोल केला आणि संघाला आघाडी मिळवून दिला. त्यानंतरही दोन्ही संघांना गोल करता आला नाही. त्यामुळे हा सामना न्यूझीलंडने 1-0 असा सहज जिंकला.
दुसरा सामना ऑस्ट्रेलिया आणि आयर्लंड यांच्यात 75,500 हजारांहून अधिक प्रेक्षकांच्या उपस्थितीत सिडनीत पार पडला. या सामन्यातही यजमान ऑस्ट्रेलियाला आयर्लंडने तगडी लढत दिली होती. दोन्ही संघांना पहिल्या हाफमध्ये गोल करता आला नव्हता.
पण दुसऱ्या हाफमध्ये सामन्याच्या 52 व्या मिनिटाला स्टेफानी कॅटलीने पेनल्टीवर गोल करत ऑस्ट्रेलियाला आघाडी मिळवून दिली. याच गोलची आघाडी ऑस्ट्रेलियाने शेवटपर्यंत कायम ठेवत विजय संपादन केला. दरम्यान या स्पर्धेला सुरुवात होण्याच्या आधीच ऑस्ट्रेलियाची स्ट्रायकर सॅम केरला पोटरीची दुखापत झाली. त्यामुळे तिला पहिल्या दोन सामन्यांना मुकावे लागणार आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
