Bangladesh Cricket announce squad for Asia Cup 2023:
पाकिस्तान आणि श्रीलंकेत 30 ऑगस्टपासून आशिया चषक 2023 स्पर्धा खेळवली जाणार आहे. त्यामुळे आता काही दिवसांचाच कालावधी राहिलेल्या या स्पर्धेसाठी सहभागी संघांनी आपापले संघ जाहीर करण्यास सुरुवात केली आहे. 9 ऑगस्ट रोजी पाकिस्तानने संघ जाहीर केला होता, आता 12 ऑगस्ट रोजी बांगलादेशनेही आपला 17 जणांचा संघ जाहीर केला आहे.
दरम्यान, संघ जाहीर करण्यापूर्वी बांगलादेश क्रिकेट बोर्डाने दिग्गज अष्टपैलू शाकिब अल हसनकडे आगामी आशिया चषक आणि वर्ल्डकप 2023 स्पर्धेसाठी नेतृत्वाची जबाबदारी सोपवली आहे.
तमिम इक्बालने ऑगस्टच्या सुरुवातीलाच अचानक वनडे कर्णधारपदाचा राजीनामा दिला होता. तसेच त्याने पाठीच्या दुखापतीमुळे आगामी आशिया चषकातूनही नाव मागे घेतले होते. त्यामुळे बांगलादेशला नव्या कर्णधाराची नियुक्ती करणे भाग होते. अशा परिस्थितीत पुढील महत्त्वाच्या स्पर्धांचा विचार करता बांगलादेशने अनुभवी अष्टपैलू शाकिबकडे ही जबाबदारी सोपवली आहे.
दरम्यान, आशिया चषकासाठी निवडण्यात आलेल्या बांगलादेशच्या संघात तांझिद हसन तमिम आणि शमिम हुसेन पटवरी यांचा समावेश करण्यात आला आहे. त्यांचा 2020 साली 19 वर्षांखालील विश्वचषक जिंकलेल्या बांगलादेश संघात सहभाग होता.
दरम्यान, सौम्य सरकारला पुन्हा संघात संधी मिळेल अशी अनेकांचा अंदाज होता. पण त्याची संघात निवड झालेली नाही. त्याचबरोबर महमुद्दलाह रियाधचाही विचार करण्यात आलेला नाही.
शाकीब अल हसन (कर्णधार), लिटन दास, तांझिद हसन तमिम, नजमुल हुसेन शांतो, तौहीद हृदोय, मुशफिकुर रहीम, मेहिदी हसन मिराझ, तस्किन अहमद, मुस्तफिजुर रहमान, हसन ममहुद, महेदी हसन, नसुम अहमद, शमीम हुसेन, अफीफ हुसैन, शोरीफुल इस्लाम, इबादत हुसेन, मोहम्मद नईम.
वनडे स्वरुपात होणारा आशिया चषकात सुपर सिक्स फेरीसाठी ए ग्रुपमध्ये भारत, पाकिस्तान आणि नेपाळ संघांचा समावेश आहे, तर बी ग्रुपमध्ये गटात श्रीलंका, बांगलादेश आणि अफगाणिस्तान या संघांचा समावेश आहे.
सुपर सिक्स फेरीनंतर प्रत्येक गटातील अव्वल दोन संघ सुपर फोर फेरीत प्रवेश करतील. सुपर फोर फेरीत देखील चार संघात साखळी पद्धतीने सामने खेळवले जातील, यातून गुणतालिकेतील अव्वल दोन संघ 17 सप्टेंबर दरम्यान अंतिम सामना कोलंबोला खेळणार आहेत.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.