Olive Ridley Turtle: मोरजी किनारा विकासासाठी निर्बंधित क्षेत्र करू- विश्वजीत राणे

हंगामातील पहिल्या कासवाने मांद्रे येथे अंडी दिली आहेत. संशोधक आणि इतरांसाठी हा मोठा अनुभव असू शकतो, असे म्हणत वन आणि नगरविकास मंत्री विश्वजीत राणे यांनी संपूर्ण मोरजी समुद्र किनारा विकासासाठी निर्बंधित क्षेत्र म्हणून जाहीर करावे, यासाठी केंद्राकडे मागणी करणार असल्याची माहिती त्यांनी दिली आहे.

राज्यात ऑलिव्ह रिडले कासवांचे संरक्षण करण्यासाठी मजबूत व्यवस्थापन आणि प्रभावी संवर्धन उपाययोजना करण्यासाठी वन विभाग सक्रिय असल्याचे त्यांनी म्हटले आहे. वन विभाग आणि संशोधक, शास्त्रज्ञ डोंगरे यांच्या सल्ल्यानुसार मोरजी येथील सर्वेक्षण क्रमांक १२२/१ - अ आणि सर्वेक्षण क्रमांक १२२ हे अविकसित क्षेत्र म्हणून घोषित केले जाईल आणि या भागातील पर्यावरणाचे संरक्षण आणि जतन करण्यावर भर दिला जाईल.

याशिवाय या क्षेत्रात कोणत्याही प्रकारचे बांधकाम केले जाणार नाही, याची पुरेपूर काळजी घेतली जाईल. हा भाग विकासासाठी निर्बंधित क्षेत्र म्हणून अधिसूचित करावा, असे केंद्राला कळविले जाईल, असे मंत्री राणे यांनी म्हटले आहे.