गोव्याच्या जलस्रोत खात्याची गोपनीय माहिती झाली हॅक

पणजी : गोव्यात हॅकर्सनी सरकारी वेबसाईटना लक्ष्य केल्याने एकच खळबळ उडाली आहे. गोव्याच्या जलस्रोत खात्याचा पुराशी संबंधित डाटा हॅक करण्यात आला आहे. सरकारच्या या महत्त्वाच्या खात्याची माहिती चोरणाऱ्या हॅकर्सनी क्रिप्टो करन्सीची मागणी केली आहे. याप्रकरणी अज्ञात हॅकरविरोधात पोलिसात तक्रार दाखल करण्यात आली आहे.(Water resource data hack in Goa)

गोव्यात एखादी सरकारी वेबसाईट हॅक होण्याची ही पहिलीच वेळ आहे. गोव्यातील जलस्त्रोत खात्याचा गोपनीय डेटा हॅकर्सच्या ताब्यात गेल्यामुळे सायबर गुन्हे शाखाही खडबडून जागी झाली आहे. हा हॅकर नेमका भारतामधून हॅकिंग करतोय की भारताबाहेरून याचा शोध सध्या सुरु असून क्रिप्टो करन्सीची मागणी केल्याने त्याला शोधण्यात अडचणी येण्याची शक्यता आहे. तसंच या खात्याची वेबसाईट हॅक झाली असेल तर अन्य महत्त्वाच्या खात्यांची वेबसाईटही हॅकर्सकडून लक्ष्य केली जाऊ शकते, अशी भीती व्यक्त केली जात आहे. (Goa News)

दरम्यान गोव्यात हॅकिंगची ही काही पहिलीच घटना नाही. काही महिन्यांपूर्वी गोवा फॉरवर्डचे अध्यक्ष आणि फातोर्ड्याचे आमदार विजय सरदेसाई यांचं फेसबुक पेज पुन्हा एकदा हॅक करण्यात आलं होतं. सरदेसाई यांनी यासंदर्भात सायबर गुन्हे विभागात तक्रार दाखल केली आहे. या पूर्वीही एकदा सरदेसाई यांचा ट्विटर अकाऊंट असंच हॅक केलं होता.

कुणीतरी आपलं अधिकृत फेसबुक पेज हॅक करून त्यावरून लोकांना आक्षेपार्ह संदेश पाठविले असल्याचा खुलासा सरदेसाई यांनी केला होता. तसंच असे संदेश कुणाला पोहोचले असतील तर आपण त्यांची माफी मागतो असे सरदेसाई यांनी ट्विटमध्ये म्हटले होतं.