Pipeline Burst: सांतिनेज जंक्शन परिसरात जलवाहिनी फुटली, हजारो लिटर पाणी वाया

Pipeline Burst सध्या गोव्यातील काही भागात पाणी टंचाई जाणवत असताना जल वाहिन्या फुटण्याचे प्रकार घडत आहेत. पणजी नजीक सांतिनेज जंक्शन परिसरात आज संध्याकाळच्या सुमारास जलवाहिनी फुटण्याची घटना घडली आहे.

यात हजारो लिटर पाणी वाया गेले असून यासंबंधी अधिक माहिती प्राप्त होऊ शकली नाही.

दरम्यान आज चरावणे सत्तरी भागात पाणीपुरवठा करणारी एक पाईपलाईन फुटून हजारो लीटर पाणी वाया गेले आहे. या भागात आधीच कमी आणि नियमित पाणीपुरवठ्याची तक्रार सतत होत असते.

पाणी टंचाईचा मोठा त्रास या भागातील ग्रामस्थांना सहन करावा लागतो. त्यातच आता येथे पाईपलाईन फुटून हजारो लीटर पाणी वाया गेले आहे.

चरावणे गावात तीन चार ठिकाणी पाण्याची पाईपलाईन कित्येक दिवसापासुन फुटली असून त्यातून पाण्याची गळती होत आहे. गळतीच्या प्रमाणात अनेक ठिकाणी वाढ झाली आहे. त्यातून हजारो लीटर पाणी वाया जात आहे.