गोव्याचे मुख्यमंत्री प्रमोद सावंत यांना मतदारांचा उत्‍स्‍फूर्त प्रतिसाद...

साखळी: हरवळे गावाला स्वतंत्र पंचायतीचा दर्जा भाजप सरकारनेच दिला व या ग्रामीण दुर्गम भागाला साखळी पालिका क्षेत्रातून मुक्त केले. म्हणूनच हरवळे पंचायत क्षेत्रातील लोक सदैव भाजपच्याच पाठिशी असतात, असे उद्‌गार मुख्यमंत्री डॉ. प्रमोद सावंत यांनी काढले.

हरवळे परिसरात घरोघरी प्रचार केल्‍यानंतर मुख्‍यमंत्री बोलत होते. त्यांना मतदारांचा चांगला प्रतिसाद मिळत आहे. प्रचारादरम्‍यान मुख्यमंत्र्यांनी काही ज्‍येष्‍ठ मतदारांची भेट घेऊन सरकारच्या विविध योजनांची चौकशी केली. हरवळेला स्वतंत्र पंचायत इमारत आपण आपल्या आमदारकीच्या कारकीर्दीत मिळवून दिली. या गावातील अनेक समस्या भाजप सरकारने सोडविल्या आहेत. तसेच लोकांना अनेक योजनांचा लाभही मिळवून दिला आहे. (Voters' spontaneous response to Goa Chief Minister Pramod Sawant)

म्हणूनच हरवळेत भाजपला उत्स्फूर्त प्रतिसाद मिळत असून आपण या गावातून प्रचंड आघाडी घेऊ, असा आत्मविश्वास मुख्यमंत्री सावंत (Goa CM Pramod Sawant) यांनी व्यक्त केला. प्रचारावेळी कार्यकर्ते मोठ्या संख्‍येने उपस्थित होते.

भाजपने (Goa BJP) सर्वसामान्यांपर्यंत कल्याणकारी योजना पोहचवून प्रत्येकाला आधार दिला आहे. त्यामुळे भाजपला यावेळीही जनता नक्कीच साथ देईल, असा विश्वास सावंत यांनी व्यक्त केला.

काॅंग्रेसने धुडकावली होती मागणी

हरवळे या ग्रामीण भागाला साखळी पालिकेतून बाजूला करून वेगळी पंचायत करण्‍याची मागणी काँग्रेसने (Goa Congress) धुडकावली होती. ही मागणी पूर्ण करण्याचे आश्वासन माजी मुख्यमंत्री मनोहर पर्रीकर यांनी 2012 सालच्‍या निवडणुकीत दिले व पूर्णही केले. आज हरवळे विकासाच्या मार्गावर आहे, असे मुख्‍यमंत्री सावंत म्‍हणाले. हरवळेतील जनता प्रामाणिक असून, यावेळीही भाजपच्या बाजूने राहणार असल्याचे ते म्हणाले.