फातोर्ड्यातील बंद केलेली कामे जर...:विजय सरदेसाईंचा इशारा

मडगाव: विकासाचा मॉडेल फातोर्डा संपूर्ण राज्यासमोर आणण्याच्या दृष्टीने मतदारसंघात सुरू केलेली 22 कोटींची विकासकामे हातात घेतली आहेत ती पूर्ण झाल्यास फातोर्ड्यात भाजपाचा पराभव निश्चित हे जाणल्यामुळे एका खोट्या तक्रारीची दखल घेऊन सरकारने ही कामे बंद केली आहेत असा आरोप गोवा फॉरवर्डचे (Goa Forward) अध्यक्ष विजय सरदेसाई (Vijay Sardesai) यांनी करून 24 तासात ही पुन्हा सुरू केली नाहीत तर परिणामाला सामोरे जाण्यास तयार राहावे असा इशारा दिला.

मडगावच्या (Margao) नगरसेवका बरोबर आज घेतलेल्या पत्रकार परिषदेत विजय सरदेसाई यांनी आरोप केला. 11 पैकी 8 प्रभागातील कामे बंद पाडणाऱ्या भाजपाला (BJP) आता लोकांनी प्रश्न विचारावा असे सरदेसाई म्हणाले. ही कामे बंद पाडण्यात दामू नाईक यांचा हात आहे हे आम्ही प्रत्येक मतदाराच्या घरी जाऊन सांगू असा इशारा त्यांनी दिला. 24 तासात ही कामे परत सुरू झाली नाहीत तर आम्ही रस्त्यावर उतरून ज्या तरेचे आंदोलन करतील त्याचा लोकांनाही त्रास होऊ शकतो आणि त्याला पूर्णतः भाजप जबाबदार असेल असा इशारा त्यांनी दिला.

दोन दिवसांपूर्वी मुख्यमंत्री प्रमोद सावंत (Chief Minister Pramod Sawant) फातोर्डा मतदारसंघात आले होते त्यावेळी त्यांनी फातोर्ड्या डबल इंजिनचा विकास केला जाईल असे सांगितले होते. मात्र हे डबल इंजिन फातोर्ड्यालाच डिरेल करण्यासाठी पुढे सरले आहे असे सांगून हे कदाचित दुसरीकडे खपवून घेतले जातील पण फातोर्ड्यात घेतले जाणार नाही असा इशारा त्यांनी दिला.

दरम्यान, ही कामे सुरू करण्यासाठी स्वतः मुख्यमंत्री सावंत यांनी मंजुरी दिली मग आताच त्यांना या प्रकल्पात खोट का दिसून आली असा सवाल त्यांनी केला. हे विचारण्यासाठी आपण मुख्यमंत्री सावंत याना फोन केला पण त्यांनी तो घेतला नाही. कामे बंद केली म्हणून जिंकून येत नाहीत उलट पराभूत होतात हे भाजपला नगरपालिका निवडणुकीत कळून आले त्यामुळे आताही ही कामे बंद करून आपण जिंकून येणार या भ्रमात दामू नाईक यांनी राहू नये. यावेळी त्यांचा पराभव आणखी जास्त मतांनी होईल असे ते म्हणाले.

यावेळी नगराध्यक्ष लिंडन परेरा आणि अन्य नगरसेवकांनी आपली मते मांडली. दामू नाईक विकास अडवीत असून ते जेव्हा मते मागायला येणार तेव्हा लोक त्यांना हा प्रश्न विचारणार असे त्यांनी सांगितले.