Vasco to Chennai Train: वास्को ते चेन्नई साप्ताहिक रेल्वेसेवा सुरू करा! रेल्वे सल्लागार समितीची हुबळी येथे बैठक

Vasco Chennai Train Service : वास्को ते चेन्नई ही साप्ताहिक रेल्वेसेवा पुन्हा सुरू करावी, अशी मागणी दक्षिण-पश्चिम विभागीय रेल्वे प्रवासी सल्लागार समितीच्या हुबळी येथे झालेल्या बैठकीत समितीचे सदस्य देवानंद नाईक भंडारी यांनी केली.

यावेळी ही गाडी सध्या हुबळीपर्यंतच धावत असून लोहमार्गाचे दुपदरीकरण पूर्ण झाल्यावर ही सेवा पूर्ववत सुरू केली जाईल, असे आश्वासन देण्यात आले.

भंडारी यांनी या बैठकीत सावर्डे-कुडचडे रेल्वे स्थानकावर सुरक्षा दलाची चौकी सुरू करावी, अशी मागणी केल्यावर सुरक्षा दल तैनात केले जाईल आणि अधिक सुरक्षेसाठी सीसीटीव्ही यंत्रणा कार्यान्वित करण्यात येईल, असे बैठकीत ठरवण्यात आले.

सावर्डे-कुडचडे रेल्वे स्थानकाचे काम जुलैपर्यंत पूर्ण केले जाणार असल्याची माहितीही बैठकीत देण्यात आली.

समितीची २५वी बैठक मंगळवारी (ता.२४) हुबळी येथील चालुक्य इन्स्टिट्यूटमध्ये पार पडली. बैठकीचे अध्यक्षस्थान अतिरिक्त महाव्यवस्थापक पी. अनंत यांनी भूषविले. प्रवासी सुविधा, रेल्वे गाड्यांच्या सेवा आणि पायाभूत सुविधा विकासासंदर्भातील विविध मुद्यांवर सविस्तर चर्चा केली.

दक्षिण पश्चिम रेल्वेचे एप्रिल ते डिसेंबर २०२५ दरम्यान एकूण उत्पन्न ६ हजार ६९४.०५ कोटी रुपये इतके झाले असून मागील वर्षाच्या तुलनेत ११.४४ टक्के वाढ नोंदवली गेली आहे. प्रवासी उत्पन्न २ हजार १९६.०९ कोटी रुपये, मालवाहतूक उत्पन्न विक्रमी ४ हजार ०३९ कोटी रुपये, इतर उत्पन्न १६७ कोटी रुपये आणि पार्सल उत्पन्न विक्रमी १२९ कोटी रुपये इतके झाले आहे, अशी माहिती बैठकीत देण्यात आली.

असोल्डा उड्डाणपुलाबाबत विशेष चर्चा

कुडचडेचे आमदार नीलेश काब्राल यांनी असोल्डा येथील उड्डाणपुलाचा विषय मांडला तेव्हा यासाठी ३३ हजार ३७९ चौरस मीटर जमिनीची गरज होती व फक्त २८ हजार ८६६ चौरस मीटर जमीन उपलब्ध होत होती. याशिवाय उड्डाणपुलाची जागा बदलण्याची मागणी पुढे आली.

सुचवलेली नवी जागा उड्डाणपूल बांधण्यासाठी योग्य नसल्याचे दिसून आले. असोल्डा येथे दुचाकींसाठी लोहमार्गाच्या खाली भुयारी मार्ग बांधण्यासाठी शक्याशक्यतेचा अभ्यास करण्यात येत असल्याची माहितीही यावेळी बैठकीत देण्यात आली.