खासगी टॅक्सीचालकांची मनमानी, पर्यटकांची नाराजी

पणजी : गोव्यात कोरोनाची लाट ओसरताच पर्यटकांचा ओघ पुन्हा सुरु झाला आहे. पर्यटक विविध मार्गांनी गोव्यात दाखल होतात. मात्र गोव्यात येताच टॅक्सीचालकांची मनमानी आणि दर पाहून त्यांचे डोळे विस्फारतात. त्यामुळे साहजिकच पर्यटकांची टॅक्सीचालकांकडे पाठ होत असल्याचं चित्र आहे. (Tourist in Goa News Updates)

गोव्यात (Goa) पर्यटक रेल्वे, विमान किंवा बसने दाखल होतात. गोव्यात पर्यटन करण्यासाठी प्रवाशांना सार्वजनिक वाहतूक व्यवस्थेपेक्षा खासगी वाहनं सोयीस्कर ठरतात, मात्र खासगी टॅक्सीचालकांकडून अव्वाच्या सव्वा रक्कम उकळली जात असल्याने पर्यटकांमध्ये नाराजी चित्र आहे. पर्यटन हंगाम सुरु होताच भाड्याच्या बाईक आणि टॅक्सींचे दरही गगनाला भिडतात. त्यामुळे पर्यटकांवर जास्तीचा भुर्दंड पडतो.

पर्यटकांसमोर (Tourist) दुसरा कुठलाही पर्याय नसल्यामुळे जास्तीचे पैसे देऊन गाडी भाड्याने घ्यावी लागते. गोव्यात सार्वजनिक वाहतूकही मर्यादित असल्याने तसेच त्याला वेळेची मर्यादा असल्याने जास्तीचे पैसे मोजून पर्यटक खासगी गाड्या भाड्याने घेतात. पर्यटकांनी खासगी टॅक्सीचालकांच्या मनमानीवर नाराजी व्यक्त केली आहे. ओला, (Ola) उबरसारखे पर्याय गोव्यात उपलब्ध नसल्याने पर्यटकांना खासगी भाड्याच्या वाहनांवर अवलंबून राहावे लागते. जास्त पैसे देत पर्यटक रेंट अ कार किंवा रेंट अ बाईक घेऊन पर्यटन करावं लागत असल्याने पर्यटकांमध्ये नाराजीचा सूर आहे.