खाण घोटाळ्यापेक्षा मोठा घोटाळा शिक्षणात विभागात : चंद्रशेखर वस्त

वास्को : गोव्यात खाण घोटाळ्यापेक्षा मोठा घोटाळा शिक्षणात विभागातून होत आहे. यात काँग्रेस, मगो, भाजप नेतेच भ्रष्टाचार करीत असलेले आहे. वास्को पूर्ण सुविधांनी सजलेले शहर होते. परंतु आज वास्कोची स्थिती बांगलादेशासारखी करून ठेवली आहे. याला पूर्णपणे जबाबदार राज्य सरकार व येथील पालिका मंडळ असल्याचा खळबळजनक आरोप वास्को मतदार संघाचे अपक्ष उमेदवार चंद्रशेखर वस्त यांनी केला. (Chandrashekhar Vast on BJP Government News Updates)

वास्को मतदार संघाचे अपक्ष उमेदवार तथा समाज कार्यकर्ते चंद्रशेखर महादेव वस्त यांनी वास्को मुरगाव पालिकेसमोर आयोजित जाहीर सभेत सरकारवर निशाणा साधला. यावेळी पुढे बोलताना चंद्रशेखर वस्त म्हणाले की, वास्को (Vasco) मतदारसंघ विकासापासून दुर्लक्षित राहिला तो येथील लोकप्रतिनिधी व मुरगाव नगरपालिका मंडळाच्या संगीत खुर्ची मुळे. वास्कोचा विकास करण्यास येथील आमदार, मंत्री पूर्णपणे अपयशी ठरले असल्याचा आरोप वस्त यांनी केला.

भाजपचे उमेदवार कृष्णा साळकर यांनी 2 हजार 80 चौरस मीटर कोमुनिदाद जागेत करोडो रुपयांचा घोटाळा केला असून त्याचे सर्व पुरावे माझ्याजवळ असल्याने निवडणुकीनंतर (Goa Assembly Elections) त्याचा न्यायालयात कायदेशीर लढाई करणार अशी माहिती वस्त यांनी दिली. तसेच साळकर यांनी मुरगाव नियोजन विकास प्राधिकरणाचे चेअरमन राहून अनेक इमारतीतील घोटाळे केले असल्याचा खळबळजनक आरोप चंद्रशेखर वस्त यांनी केला आहे. वास्कोत सुसज्ज असे मासळी मार्केट नाही, बसस्थानक उपलब्ध नाही, याला सत्ताधारी राजकीय पक्ष जबाबदार असल्याचा आरोप वस्त यांनी दिली.

प्रकाश वस्त यांनी भाजप (BJP) सरकारने मोठा भ्रष्टाचार केला असल्याचा निशाणा साधला. वास्को इंडियन ऑईल कंपनीत पेट्रोल घोटाळा, नाफ्ता प्रकरणात भाजप व काँग्रेस पक्षाची मिलीभगत होती. पक्षनीती न सांभाळणारे राजकीय नेते भ्रष्टाचार करीत करून करोडो रुपयांचे धनी झाले आहेत. मात्र जनता अजूनही योजना व विकासाची वाट पाहत आहे, असा आरोपही वस्त यांनी केला.