Goa Crime: संतापजनक! 80 वर्षाच्या वृद्धेवर वारंवार अत्याचार; 50 वर्षीय आरोपीचा जामीन न्यायालयाने फेटाळला

पणजी: थिवी येथील वृद्धेवर (८० वर्षे) वारंवार अत्याचार केल्याचा आरोप असलेल्या ५० वर्षीय प्रवीण कुडाळकर या आरोपीचा जामीन अर्ज पणजी येथील पॉक्सो न्यायालयाने फेटाळून लावला आहे. मंगळवारी न्यायाधीश डॉ. पूजा कवळेकर यांनी हा आदेश दिला.

सरकारी पक्षाने न्यायालयात दिलेल्या माहितीनुसार, आरोपीने थिवी येथील माडेल भागात राहणाऱ्या वृद्धेच्या घरात बेकायदेशीरपणे प्रवेश करून तिच्यावर जबरदस्तीने अत्याचार केला. ही घटना २० जून २०२५ रोजी उघडकीस आली. आरोपीने सलग तीन दिवस तिच्यावर अत्याचार केल्याचे देखील तक्रारीत नमूद करण्यात आले आहे.

न्यायालयाने आपल्या आदेशात या गुन्ह्याचे स्वरूप ‘अतिशय गंभीर’ असल्याचे नमूद केले. एका हतबल ज्येष्ठ नागरिकेसोबत घडलेला हा गुन्हा समाजाला धक्का देणारा आहे, असे निरीक्षण न्यायालयाने नोंदवले.

आरोपी कुडाळकर याच्या वकिलांनी जामिनासाठी दोन मुख्य मुद्दे मांडले होते. पहिला म्हणजे संशयित मानसिकदृष्ट्या अस्थिर आहे आणि दुसरा म्हणजे पीडितेने वेगवेगळ्या कलमांखाली नोंदवलेल्या जबाबांमध्ये तफावत आहे. मात्र, आरोपपत्रात या दाव्याला पुष्टी देणारा कोणताही वैद्यकीय पुरावा सादर करण्यात आलेला नाही, असे न्यायालयाने स्पष्ट केले.