Goa News: पर्वरीत सर्वात उंच 21 फुटी शिवपुतळा

Goa News: शिवजयंती उत्सवाचे औचित्य साधून येथील ‘मॉल द गोवा’च्या मागील जागेत राज्यातील सर्वात मोठ्या 21 फूट उंचीच्या छत्रपती शिवरायांच्या पूर्णाकृती पुतळ्याचे अनावरण मुख्यमंत्री डॉ. प्रमोद सावंत यांच्या हस्ते आज संध्याकाळी अनेक मान्यवरांच्या उपस्थितीत करण्यात आले.

या चौकाचे नामकरणही ‘छत्रपती शिवाजी महाराज चौक’ असे करण्यात आले. शिवरायांनी जिजाऊंकडून राजकारणाचे धडे घेऊन 18 पगड जातीच्या लोकांना सोबत घेऊन हिंदवी स्वराज्य स्थापन केले.

शिवरायांप्रमाणेच आमचे पंतप्रधान नरेंद्र मोदी हेही सर्व लोकांना सोबत घेऊन देशाला सर्वोत्तम देश बनवण्यासाठी प्रयत्नशील आहेत.

देशहितासाठी सर्वांनी पंतप्रधान मोदीजींना पाठिंबा दिला पाहिजे, असे यावेळी मुख्यमंत्र्यांनी सांगितले. शिक्षक प्रशिक्षण केंद्रात शिवकालीन शस्त्रांचे प्रदर्शन आयोजित केले होते.

या प्रदर्शनासही पुतळा अनावरण सोहळ्यापूर्वी मुख्यमंत्री व इतर मान्यवरांनी भेट देऊन शस्त्रांची पाहणी केली.

या कार्यक्रमास मुख्यमंत्र्यांसह, खासदार सदानंद शेट तानावडे, केंद्रीयमंत्री श्रीपाद नाईक, पर्यटनमंत्री रोहन खंवटे, मत्स्योद्योगमंत्री नीळकंठ हळर्णकर, हळदोण्याचे आमदार कार्लुस फेरेरा, सुकूर जिल्हा पंचायत सदस्य कविता नाईक, पेन्ह द फ्रान्स व साल्वादोर द मुंद पंचायतीचे पंच व सरपंच तसेच मान्यवर उपस्थित होते.