शेल्डे सरपंच दीप्ती नाईक यांच्यावर आणलेला अविश्वास ठराव आज सोमवारी ८ विरुद्ध ३ मतांनी संमत झाला. या खास बैठकीला अकराही पंचसदस्य उपस्थित होते.
सरपंच नाईक यांच्यावर आठ पंचसदस्यांनी अविश्वास ठराव दाखल केला होता. या ठरावावर चर्चा करण्यासाठी आज सकाळी खास बैठक बोलाविण्यात आली होती. यावेळी निर्वाचन अधिकारी म्हणून केपेचे गटविकास अधिकारी अनिल नाईक उपस्थित होते
ज्या आठ पंचसदस्यांनी अविश्वास ठराव दाखल केला होता, त्यांनी हात उंचावून ठरावाच्या बाजूने मतदान केल्याने हा ठराव आठ विरुद्ध तीन मतांनी संमत करण्यात आला.
उपसरपंच प्रमोद गावस देसाई म्‍हणाले की, सरपंच दीप्ती नाईक या पंचसदस्यांना विश्वासात न घेता एकतर्फी निर्णय घेत होत्या. या पंचायतीचे सरपंचपद महिलांसाठी राखीव आहे. आता सरपंचपदाची माळ कविता गावस देसाई यांच्या गळ्यात पडणार असल्याची चर्चा आहे. तरीसुद्धा कुडचडेचे आमदार नीलेश काब्राल यांच्या मार्गदर्शनाखाली पुढील सरपंच निवडण्यात येणार असल्याचे देसाई यांनी सांगितले.
म्हणून आणला अविश्वास ठराव
पंचसदस्य जोहान फर्नांडिस यांच्या रहिवाशी प्रकल्पाचे काम नवीमड्डी-तिळामळ येथे सुरू आहे. काही दिवसांपूर्वी रस्त्याच्या प्रश्नावरून या प्रकल्पाविरोधात नवीमड्डी येथील लोकांनी पंचायतीवर मोर्चा नेला होता. त्‍यामुळे सरपंच दीप्ती नाईक यांनी सदर प्रकल्पाचे काम बंद करण्याचा आदेश दिला होता.
मात्र हा आदेश देताना त्यांनी अन्‍य पंचसदस्यांना विश्वासात घेतले नव्‍हते. त्‍यामुळेच त्‍यांच्‍यावर अविश्वास ठराव आणल्‍याचे बोलले जात आहे.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
