CM Pramod Sawant : 'नमो' सारखं आता 'सीएम ॲप', मुख्यमंत्री सावंत यांचे पंतप्रधान मोदींच्या पावलावर पाऊल

Cm Of Goa : पंतप्रधान नरेंद्र मोदी यांनी नमो ॲप लॉन्च केला होता. त्या ॲपच्या धर्तीवर मुख्यमंत्री डॉ. प्रमोद सावंत आता सीएम ॲप लॉन्च करणार आहेत. सरकार स्वयंपूर्ण ॲप किंवा सीएम ॲप विकसित करण्याच्या विचाराधीन असल्याचे मुख्यमंत्र्यांनी सांगितले.

येथील मिनेझिस ब्रागांझा सभागृहात तालुका नोडल अधिकारी आणि 'स्वयंपूर्ण मित्र यांच्या मार्गदर्शन आणि प्रशिक्षण कार्यक्रमात त्यांनी याबाबतची माहिती दिली.

या ॲपमध्ये मुख्यमंत्री, मंत्री, आमदार, खासदार आणि अधिकारी त्यांनी केलेल्या कामाची अपडेट करतील त्यामुळे त्यांनी केलेल्या कामाची माहिती इतरांना मिळविणे सोपे होईल.

सरकारच्या योजना तळागाळात तसेच अंतोद्य तत्वावर समाजाच्या शेवटच्या घटकापर्यंत पोहचवण्यासाठी स्वयंपूर्ण मित्रांची नेमणूक केली आहे. त्यांनाही या ॲपचा फायदा होणार आहे.

स्वयंपूर्ण मित्रांना विविध पंचायतींमध्ये अवलंबल्या जाणाऱ्या पध्दती जाणून घेण्यास व त्यांची अंमलबजावणी करण्यास मदत होणार आहे. तसेच या ॲपवर स्वयंपूर्ण मित्र त्यांचे नित्य उपक्रम अपडेट करु शकतात.