Goa Taxi: समन्वय समितीच्या प्रस्तावाला तीव्र विरोध! सल्लामसलत न केल्याबद्दल टॅक्सी चालक झाले नाराज

Goa Taxi Drivers Issue

पणजी: राज्यातील टॅक्सीचालकांनी आमदार मायकल लोबो आणि आरटीआय कार्यकर्ते सुदीप ताम्हणकर यांनी मुख्यमंत्री प्रमोद सावंत यांना सादर केलेल्या समन्वय समितीच्या प्रस्तावाला तीव्र विरोध दर्शविला आहे. या प्रस्तावाच्या आधी त्यांच्याशी सल्लामसलत न केल्याबद्दल टॅक्सी चालकांनी नाराजी व्यक्त केली. दरम्यान, बैठकीत उपस्थित सुदीप ताम्हणकर यांनी आपण आपला प्रस्ताव मागे घेण्याचे मान्य केले.

टॅक्सी चालकांनी बैठकीत सांगितले की, आमच्या भवितव्यावर परिणाम करणारे कोणतेही निर्णय घेण्यापूर्वी आमच्याशी चर्चा करणे अत्यावश्यक आहे. सोबतच लोबो यांनी टॅक्सी चालकांच्या मतांकडे दुर्लक्ष्य केल्याचा आरोपदेखील चालकांनी केला.

याबाबत आरटीआय कार्यकर्ते सुदीप ताम्हणकर यांनी सांगितले की, जर टॅक्सी चालकांचा पाठिंबा नसेल तर हा प्रस्ताव मागे घेतला जाईल. मात्र, या आश्वासनाने चालकांची नाराजी कमी झाली नाही. त्यांनी या प्रक्रियेत पारदर्शकता आणि सर्वसमावेशकता असण्याची मागणी देखील केली.

गोव्यातील खासगी टॅक्सी ऑपरेटर आणि ॲप आधारित टॅक्सी अॅग्रीगेटर्समधील वाद मिटविण्यासाठी समन्वय समिती स्थापनेची मागणी मायकल लोबो आणि खासगी बसमालक संघटनेचे सरचिटणीस सुदीप ताम्हणकर यांनी मुख्यमंत्र्यांना बुधवारी निवेदन सादर करून केली होती.