Goa Ganesh Chaturthi 2023: म्हापशातील स्वर साई घुमट आरती मंडळाची गगनभरारी

Goa Ganesh Chaturthi 2023: गणेश चतुर्थी हा गोव्यातील मोठा उत्सव असून, बाप्पाविषयी असलेली श्रद्धा, आपुलकी तसेच सांस्कृतिक वेगळेपण गोमंतकीयांनी आजही जपले आहे. आणि याच वैविध्यपूर्णतेमुळे गोव्यातील चतुर्थी आकर्षणाचे केंद्रबिंदू ठरते.

या काळात घरांपासून, वाड्यापर्यंत तसेच शहरापासून ते राज्यस्तरीय स्पर्धांमध्‍ये घुमट आरत्यांचा गजर कानी पडतो आणि हाच घुमटांचा वारसा म्हापसा येथील स्वर साई घुमट आरती मंडळाने मागील 18 वर्षांपासून जपला आहे.

स्वर साई घुमट आरती मंडळ हे गोव्यातील एक नावाजलेले मंडळ. आतापर्यंत या पथकाने विविध स्पर्धांमध्ये जवळपास २०० पेक्षा अधिक प्रथम क्रमांकाची पारितोषिके पटकावली आहेत. तर, २०२२ मध्ये या पथकाने तब्बल ४७ पहिल्या क्रमांकाची बक्षिसे मिळविली, जो एक विक्रमच ठरला आहे.

स्वर साई घुमट आरती मंडळ राज्यपातळीवरील आयोजित घुमट आरती स्पर्धांसह तालुका, जिल्हा तसेच अखिल गोवा पातळीवर स्पर्धांत सहभाग घेते. या पथकाने आपल्या सादरीकरणातून स्वतःची वेगळी छाप गोमंतकीयांमध्ये निर्माण केली आहे.

या आरती मंडळात विविध वयोगटातील युवांचा सहभाग असून त्यांना पूजेस्थळी किंवा घरांमध्ये विशेषतः घुमट आरती सादरीकरणासाठी आग्रहाचे निमंत्रण दिले जाते. स्वर साई घुमट आरती मंडळाचाचा ड्रेस कोड हा भगवा व ऑफ व्हाईट कोटी आहे.

मंडळाचे शिलेदार

या आरती मंडळात आशिष नरसुले (अध्यक्ष), स्वप्‍निल म्हापसेकर, पद्ममेश नाईक, साईनाथ राऊळ, पृथ्वीराज गावस, योगेश वळवईकर, दीक्षीत साळगावकर, अभिजीत नरसुले, ओमकार शिरोडकर, साईश चोडणकर, रोहन नागवेकर, स्वप्‍निल कळंगुटकर, साहिल कळंगुटकर, परेश नाईक, ब्रिजश भोसले, नवज्योत गोलतेकर, बालकृष्ण आईर, प्रतीक चोडणकर, वरद साळगावकर, युगेश शिरोडकर, सिद्धांत शिरोडकर, आकाश वायंगणकर व राज केरकर यांचा समावेश आहे.