'मोपा आंतरराष्ट्रीय विमानतळ कामाचे सर्व आराखडे सादर करा'

मोरजी: मोपा आंतरराष्ट्रीय विमानतळाचे काम सुरू आहे. त्याचे सर्व आराखडे पंचायतींकडे उपलब्ध असायला हवेत. पण स्थानिकांचा असा दावा आहे की, हे आराखडे पंचायतींकडे उपलब्ध नाहीत. हे आराखडे का उपलब्ध नाहीत? याचे उत्तर ग्रामपंचायतीने द्यावे, अशा मागणीचे निवेदन मोपा पंचक्रोशी पीडित जनसंघटनेने पंचक्रोशीतील सर्व पंचायतींना सादर केले.

मोपा प्रकल्पाला स्थानिकांचा विरोध वाढू लागला आहे. हे आराखडे पंचायतीकडे शेतकऱ्यांसाठी उपलब्ध नसतील तर या प्रकल्पाचे काम कंत्राटदार उच्च न्यायालयाच्या आदेशाचे उल्लंघन करून बेकायदेशीरपणे करत असल्याचा दावा संघटनेने केला आहे. या प्रकल्पाला आता स्थानिक मोठ्या प्रमाणात विरोध दर्शवत आहेत. मोपा लिंक रोडचे काम स्थगित ठेवण्याचे आदेश ग्रामपंचायतीने कंत्राटदाराला दिले होते; पण या नोटिसीला केराची टोपली दाखवून कंत्राटदाराने रस्त्याचे काम वेगाने सुरू केले आहे. त्यामुळे स्थानिकांमध्ये तीव्र असंतोष निर्माण झाला आहे.

अटींची पूर्तता करण्याची मागणी

या संघटनेने वारखंड, चांदेल, कासारवर्णे, पोरस्कडे आणि मोपा या पंचायतींना संघटनेने निवेदन दिले. मोपा पंचक्रोशी पीडित जनसंघटनेने निवेदनात म्हटले आहे की, उच्च न्यायालयाच्या आदेशानुसार मोपा विमानतळाला हिरवा कंदील देताना काही अटी घातल्या होत्या या अटीत असे नमूद केले होते, की स्थानिक ग्रामपंचायतींकडे सर्व आराखडे असायला हवेत. त्याचप्रमाणे या प्रकल्पाचे काम करताना स्थानिक ग्रामपंचायतीला विश्वासात घेणे गरजेचे होते. या प्रकल्प परिसरात येणाऱ्या कामांची माहिती स्थानिक पंचायतीला असायला हवी, असा दावा मोपा विमानतळ पंचक्रोशी संघटनेने केला आहे.