'हिंदू आहे म्हणून डावलले', कारण एका बैठकीचे आणि म्हापसा येथील झेवियर महाविद्यालय पुन्हा आले चर्चेत

कधी पदस्थापना तर कधी शिवजयंती किंवा अंतर्गत राजकारण यावरून म्हापसा येथील सेंट झेवियर महाविद्यालय (St. Xavier's College Mapusa) नेहमीच चर्चेत असते. महाविद्यालयात अखिल भारतीय विद्यार्थी परिषदेच्या (ABVP) वतीने विविध आंदोलन देखील करण्यात आली आहेत. दरम्यान, झेवियर महाविद्यालय पुन्हा एकदा चर्चेत आले आहे, आणि त्याला निमित्त ठरली आहे. एक बैठक. या बैठकीला निमंत्रण न दिल्याने महाविद्यालयाचा विद्यार्थी प्रतिनिधीने या विरोधात आवाज उठवला आहे.

झेवियर महाविद्यालयात शनिवारी (दि.01 एप्रिल) 57 वी वार्षिक क्रीडा बैठक आयोजित करण्यात आली होती. महाविद्यालयाच्या प्रांगणात होणाऱ्या या बैठवकीला हळदोणाचे आमदार कार्लुस फेरेरा (Carlos Alvares Ferreira) प्रमुख पाहूणे म्हणून उपस्थित राहणार होते. दरम्यान, या बैठकीला महाविद्यालयाचा विद्यार्थी प्रतिनिधी साहिल महाजन (Sahil Mahajan) याला आमंत्रण दिले नाही तसेच, कार्यक्रम पत्रिकेवर देखील त्याच्या नावाचा उल्लेख केला नाही. यावरून महाजन याने महाविद्यालया प्रशासनावर टीका केली आहे.

मी एक हिंदू असल्याने महाविद्यालयाने मला वार्षिक बैठकीचे आमंत्रण दिले नाही. मी आमदार फरेरा यांना याप्रकरणी लक्ष घालण्याची विनंती करतो. प्रत्येक विद्यार्थ्याला समान वागणूक द्यायला हवी अशी मी मागणी करतो, आजच्या जगात भेदभावाला स्थान नाही. असे ट्विट महाजन याने केले आहे.

दरवर्षी क्रीडा दिवसाला विद्यार्थी प्रतिनिधीला बोलवले जाते पण, महाविद्यालयाने यावर्षी ही परंपरा मोडीत काढली. महाविद्यालय धार्मिक भेदभाव करत आहे. असा आरोप महाजन याने केला.

दरम्यान, आता याप्रकरणावरून विविध प्रतिक्रिया समोर येत आहेत. "विद्यार्थ्यांच्या मनात धार्मिक तेढ आणि जातीयवाद निर्माण करणे हा अभाविपचा एकमेव हेतू आहे. ते आता कॉलेज आणि एचएस स्तरावर करत आहेत. धर्मनिरपेक्ष राष्ट्रासाठी हा धोका आहे. कृपया अशा गोष्टींवर कठोर कारवाई करा." अशा शब्दात एका नेटकऱ्याने आपली भावना व्यक्त केली आहे.

गोवा भाजप प्रदेशचे नेते आणि आयटी सेलचे रूपेश कामत यांनी साहिल महाजन याच्या समर्थनात ट्विट केले आहे. "निमंत्रणपत्रिकेतच सर्व स्पष्ट दिसत आहे, महाविद्यालय प्रशासनाच्या रक्तात धार्मिक वंशवाद आणि वर्णद्वेष आहे." असे ट्विट कामत यांनी केले आहे.