Illegal Tax Collection: विनापावती सोपो कर गाजणार!

Illegal Tax Collection in Panaji: पणजी महानगरपालिकेची उद्या शुक्रवारी रोजी संध्‍याकाळी ४ वाजता बैठक होणार आहे.

नगरसेवक उदय मडकईकर यांनी चव्हाट्यावर आणलेला विनापावती सोपो कराचा विषय आणि पुढील काही आठवड्यांत महापौर-उपमहापौर व आयुक्त अशा तिघांच्‍या संभाव्य ऑस्ट्रेलिया दौऱ्यासाठीच्‍या खर्चाला मान्यता मिळविण्याचा विषय या बैठकीत चांगलाच गाजण्याची शक्यता आहे.

माजी महापौर तथा नगरसेवक मडकईकर यांनी तीन दिवसांपूर्वी मासळी मार्केटबाहेर रस्त्याच्या बाजूला बसणाऱ्या विक्रेत्यांकडून महानगरपालिका कर्मचारी विनापावती सोपो कर घेत असल्याचा व्हिडिओ व्हायरल केला होता.

त्यातून दोन वर्षांपासून विनापावती कर आकारणी होत असल्याचे स्‍पष्‍ट झाले होते. परंतु सुपरवायझरच्या प्राथमिक चौकशीत आयुक्तांना हा प्रकार पधंरा वर्षांपासून सुरू असल्याचे समोर आले आहे.

त्यामुळे पंधरा वर्षांपासून वसूल झालेल्या करापैकी किती रक्कम महानगरपालिकेच्या तिजोरीत गेली आणि किती कोणाच्या खिशात गेली, याची चौकशी आयुक्तांनी सुरू केली आहे.

हा विषय ताजा असल्याने विरोधी बाकावरील सुरेंद्र फुर्तादो, उदय मडकईकर या बैठकीत पूर्ण तयारी निशी उतरणार आहेत.

नगरसेवकांच्या व्हॉट्सॲप ग्रुपवर ज्या पद्धतीने नगरसेवक आळीमिळी गुपचिळीसारखे बसतात, त्यावरून अनेकांची या प्रकाराकडे बघ्याची भूमिका राहणार हे स्पष्ट आहे.

शिवाय शहरात सुरू असलेल्या गेमिंगसाठी प्रोटेक्शन मनी संकलन करण्याची चर्चाही नगरसेवकांमध्ये आहे. त्यामुळे हा विषयही ऐऩवेळी पुढे येणार असे दिसते.

मार्केट इमारत दुरुस्तीचा विषयही येणार

काही आठवड्यांनी महापौर रोहित मोन्सेरात, उपमहापौर संजीव नाईक आणि आयुक्त असे तिघेजण ऑस्ट्रेलियाच्या दौऱ्यावर जाणार आहेत. त्या दौऱ्याचा खर्च महानगरपालिकेच्या तिजोरीतून होणार आहे.

या खर्चाचा विषय या बैठकीत मंजुरीला टाकण्याची शक्यता आहे. शिवाय मागील बैठकीतील काही विषयांना मंजुरी देण्यासह मार्केट इमारतीची दुरुस्ती, संगणकतज्‍ज्ञाच्या सेवाकार्यास मुदतवाढ असेही काही विषय विषयपत्रिकेवर आहेत. त्‍यावरही गरमागरम चर्चा होण्‍याची शक्‍यता आहे.