Mahadayi Water Dispute: कर्नाटकात म्हादईसंदर्भातील मौन भाजपच्या दुटप्पी वृत्तीचा पुरावा- सरदेसाई

Mahadayi Water Dispute कळसा-भांडुरा येथील वादग्रस्त सिंचन प्रकल्प कुठल्याही स्थितीत पूर्ण करणारच अशी भूमिका कर्नाटक भाजपने आपल्या जाहीरनाम्यात स्पष्ट केल्यानंतरही सध्या कर्नाटक निवडणूक प्रचार दौऱ्यावर असलेल्या गोव्यातील एकही भाजप नेत्याने त्यावर एक शब्दही उच्चारलेला नाही.

या पार्श्वभूमीवर गोवा फॉरवर्डचे अध्यक्ष विजय सरदेसाई यांनी ‘या मौनातून गोव्यातील भाजप नेत्यांची दुटप्पी भूमिका स्पष्ट होत आहे’ अशी टीका केली आहे.

10 मेच्या कर्नाटक विधानसभा निवडणुकीपूर्वी भाजपने दिलेल्या आश्वासनानंतर, गोवा फॉरवर्ड पार्टीतर्फे केलेल्या ट्विटमध्ये भगव्या पक्षाच्या या ‘लबाडीच्या ताबूत’ या स्वार्थी भाजप नेत्यांनी ठोकलेला शेवटचा खिळा असे म्हटले आहे.

“गोव्यातील भाजपच्या खोटारड्या नेत्यांनी म्हादईच्या शवपेटीत आणखी एक खिळा ठोकला असून भाजप कर्नाटकचा निवडणूक जाहीरनामा हा गोवा भाजप नेत्यांच्या माय म्हादई विकण्यात सक्रिय सहभागाचा आणखी एक पुरावा आहे, असे सरदेसाई यांनी ट्विट केले आहे.

कर्नाटकात प्रचारासाठी गावोगावी फिरत असताना, त्यांना म्हादईवर बोलण्यासाठी शब्द सापडत नाहीत, परंतु गोव्याचे मुख्यमंत्री म्हादईचा गळा घोटू पाहणारे बसवराज बोम्मई यांच्यासाठी मते मागण्यासाठी त्यांच्या आवाजात आवाज मिसळून जोरात ओरडू शकतात, अशी टीका सरदेसाई यांनी केली आहे.

विरोधकांचा भाजप नेत्यांवर निशाणा

गेल्या अनेक दिवसांपासून गोव्यातील भाजप नेते आणि मंत्री आपल्या उमेदवारांच्या प्रचारासाठी कर्नाटकातील अनेक विधानसभा मतदारसंघात तळ ठोकून आहेत.

मतदारांना आकर्षित करण्यासाठी ते जाहीर सभांमध्ये कन्नडमध्ये बोलतानाही दिसतात.

म्हादईचे पाणी वळविण्याचा प्रयत्न करणाऱ्यांना मदत केल्याबद्दल गोव्यातील विरोधकांनी या नेत्यांवर निशाणा साधला होता. विजय सरदेसाई यांनी त्यांना पुन्हा एकदा खिंडीत गाठले आहे.