Shripad Naik: उत्तर गोवा मतदारसंघाकरिता श्रीपादभाऊच!

Shripad Naik लोकसभा निवडणुकीसाठी अद्याप वेळ असला तरी भाजपमध्ये उमेदवारीवरून दावे-प्रतिदावे सुरू आहेत.

यावर आज मुख्यमंत्री डॉ. प्रमोद सावंत यांनी येत्या लोकसभा निवडणुकीसाठी उत्तर गोवा मतदारसंघाकरिता भाजपचे अधिकृत उमेदवार म्हणून श्रीपादभाऊच असतील, असे ठणकावून सांगितले.

श्रीपाद नाईक यांना मोठ्या मताधिक्याने निवडून आणा, असे जाहीर आवाहनही त्यांनी यावेळी केले.

ते आज साखळीच्या नवनिर्वाचित नगरसेवकांच्या सत्कार समारंभात बोलत होते. लोकसभेच्या निवडणुका पुढील वर्षी मार्च-एप्रिलदरम्यान होतील. उत्तर गोव्याच्या जागेसाठी उमेदवारीकरिता सध्या राजकीय चर्चांना वेग आला आहे.

लोकसभा निवडणुकीचे तिकीट कुणाला द्यायचे, याचा निर्णय पक्षाच्या संसदीय समितीतर्फे होतो. त्यामुळे इतरांच्या दाव्याला कोणताच आधार असत नाही, असेही नाईक म्हणाले.

दरम्यान, आज, बुधवारी मुख्यमंत्र्यांनी साखळी येथील जाहीर सभेत उत्तर गोवा लोकसभा मतदारसंघाचे उमेदवार श्रीपाद नाईक हेच असतील आणि त्यांना बहुमताने निवडून आणा, असे रोखठोक आवाहन केल्याने भाऊंच्या उमेदवारीच्या दाव्याला बळ मिळाले आहे.

परुळेकरांचे ‘ते’ विधान अपरिपक्व

श्रीपाद नाईक यांना भाजपचे तिकीट न मिळाल्यास आपण लोकसभा तिकिटाचा दावेदार असल्याचे माजी मंत्री दिलीप परूळेकर यांनी म्हटल्याने राजकीय चर्चेला उधाण आले होते.

यावर आज नाईक यांनी जोरदार हल्ला चढवत उत्तर गोव्याच्या उमेदवारीकरिता आपण प्रबळ दावेदार असल्याचे स्पष्ट केले. या जागेबाबत केली जाणारी विधाने ही अपरिपक्व आणि पोरकट आहेत, असाही टोला त्यांनी हाणला.