Goa Tourism: गोव्याच्या पर्यटनात मंदिरे दाखवा, कमी कपड्यातील महिला असलेले बीच नको; हिंदू जनजागृती समितीची मागणी

Hindu Janjagruti Samiti on Goa Tourism: गोव्याची प्रतिमा कॅसिनो आणि कमी कपड्यातील महिला असलेले बीच अशी बनली आहे, अशी टीका करत गोव्यात आध्यात्मिक पर्यटनाला आणि मंदिर पर्यटनाला चालना द्या, अशी मागणी हिंदू जनजागृती समितीने रविवारी केली.

गोमंतक मंदिर फेडरेशन आणि दक्षिण गोव्यातील हिंदू जनजागृती समिती यांच्या संयुक्त विद्यमाने आयोजित 'गोमंतक मंदिर-धार्मिक संस्था परिषद' या परिषदेत मंदिर संस्कृती जतन करण्यावर चर्चा झाली.

यावेळी हिंदु जनजागृती समितीचे राष्ट्रीय प्रवक्ते रमेश शिंदे म्हणाले की, "गोव्याची प्रतिमा कॅसिनो, कमी कपड्यातील महिला असलेले समुद्रकिनारे, 'सनबर्न' अशी झाली आहे. हीच गोव्याची संस्कृती आहे का? गोव्यात मंदिर संस्कृती का वाढवली जात नाही?" असा सवालही त्यांनी केला.

ते म्हणाले की, अलीकडे गोवा सरकारने मंदिर संस्कृतीला प्रोत्साहन देण्यास सुरुवात केली आहे, ही चांगली बाब आहे. उत्तर प्रदेशात 'काशी विश्वनाथ कॉरिडॉर बांधल्यानंतर, एका वर्षात 8 कोटी पर्यटकांनी तेथे भेट दिली.

तर गोव्यात, कॅसिनो, समुद्रकिनारे, 'सनबर्न' सारख्या उत्सवांना प्रोत्साहन दिले जात असूनही गेल्या वर्षी केवळ 73 लाख पर्यटकांनी गोव्याला भेट दिली. गोव्यात मंदिर पर्यटनाला चालना मिळू नये का? मंदिरांचे पावित्र्य जपणाऱ्या धार्मिक पर्यटनाला चालना मिळाली पाहिजे.

"गोव्यात काही ठिकाणी विश्वस्त, महाजन, पुजारी आदींमध्ये वाद सुरू आहेत. त्यामुळे खटले सुरू आहेत.

आज 5 कोटी खटले कोर्टात प्रलंबित आहेत आणि न्याय मिळण्यासाठी पिढ्यानपिढ्या वाट पाहावी लागत आहे. मंदिरांचे अंतर्गत वाद आपापसात मिटवले पाहिजेत, असेही शिंदे म्हणाले.