"काम लवकर पूर्ण करा, नाहीतर..."; सांकवाळमध्ये आंदोलनाचा उडणार भडका; एमईएस कॉलेजजवळील रस्ते कामातील विलंबावर नागरिकांचा संताप

वास्को: एमईएस कॉलेजजवळ सुरू असलेल्या रस्ता सुधारणा कामांना होत असलेल्या विलंबामुळे सांकवाळ येथील रहिवाशांमध्ये नाराजी वाढत असून, हे काम लवकर पूर्ण न झाल्यास आंदोलन छेडण्याचा इशारा स्थानिकांनी दिला आहे.

वाहनचालक, विद्यार्थी आणि पादचारी यांना या विलंबाचा मोठा फटका बसत आहे. वारंवार आश्वासने देऊनही प्रत्यक्षात फारशी दृश्यमान प्रगती झालेली नसल्याचा आरोप नागरिकांनी केला आहे. स्थळपाहणीदरम्यान प्रकल्पाची अंमलबजावणी करणाऱ्या एमव्हीआर इन्फ्रास्ट्रक्चर या संस्थेच्या प्रतिनिधींनी प्रलंबित युटिलिटी शिफ्टिंगच्या कामांना विलंबाचे कारण असल्याचे सांगितले.

कंपनीच्या अधिकाऱ्यांनी दिलेल्या माहितीनुसार, अदानी गॅस आणि झिओटीएल इंधन पाइपलाइनची भूमिगत पायाभूत सुविधा अद्याप स्थलांतरित करायची असल्याने रस्त्याच्या काही भागांतील कामे पूर्ण होऊ शकलेली नाहीत. मात्र, रहिवाशांनी या स्पष्टीकरणाबाबत असमाधान व्यक्त करत संबंधित यंत्रणांमध्ये अधिक प्रभावी समन्वय साधण्याची मागणी केली. "आम्ही गेल्या काही महिन्यांपासून विविध गैरसोयींचा सामना करत आहोत," अशी भावना त्यांनी व्यक्त केली.

वाहतूक कोंडी, धूळ प्रदूषण

कामाच्या संथ गतीचा निषेध करण्यासाठी तसेच रोजच्या प्रवाशांना भेडसावणाऱ्या अडचणी अधोरेखित करण्यासाठी पंच संतोष देसाई आणि पंच गिरीश पिल्लई यांच्यासह मोठ्या संख्येने रहिवासी एमईएस जंक्शनजवळ एकत्र आले होते. रस्ता दीर्घकाळापासून खोदून ठेवण्यात आल्याने वाहतूक कोंडी, धूळ प्रदूषण तसेच सुरक्षिततेचे गंभीर प्रश्न निर्माण झाल्याचे रहिवाशांनी सांगितले.