Ashtami Ferry: पणजी अष्टमी फेरीच्या अर्जांची आज विक्री

Panjim Ashtami Ferry: पणजीत भरणाऱ्या अष्टमीच्या फेरीसाठी आज महापालिकेसमोर दुकानदारांनी गर्दी केली होती.

महानगरपालिकेतर्फे दुकानदारांना अर्जांचे वाटप उद्या, मंगळवारी केले जाणार असल्याची माहिती महापौर रोहन मोन्सेरात यांनी दिली.त्यानंतर सकाळपासून ठिय्या मांडलेले दुकानदार माघारी फिरले.

गतवर्षी अर्जांचा झालेला घोळ पाहता महानगरपालिकेने यावर्षी खबरदारी घेतलेली आहे. राज्यातील पारंपरिक व्यवसायिकांना प्राधान्य असेल, फेरी धक्क्यापासून ते कला अकादमीच्या पदपथावर हे स्टॉल असतील.

साधारणतः ४०० स्टॉल उभारले जाणार असल्याची माहिती महापौरांनी दिली. एका व्यक्तीला एक अर्ज दिला जाणार आहे. अर्ज वितरणात कोणताही गोंधळ होऊ नये, यासाठी आपण संबंधित अधिकाऱ्यांना स्पष्ट बजावले आहे, असेही ते म्हणाले.

फेरी संपल्यानंतर त्या ठिकाणी महानगरपालिकेला तीन ते चार दिवस स्वच्छता करण्यासाठी लागतात, यावर्षी फेरीमध्ये दुकानदारांनी कचरा करू नये यासाठी संबंधितांना स्पष्टपणे सूचना केल्या जातील,असे पालिकेच्या सूत्रांकडून सांगण्यात आले.

एका अर्जासाठी 5-6 जणांना उभे केले !

काहीजणांना आज अर्ज विक्री होईल, अशी आशा लागून होती. त्यामुळे दुपारपर्यंत व्यावसायिक महापालिका परिसरात होते.

एका-एका व्यावसायिकाने पाच ते सहाजणांना अर्जांसाठी उभे केल्याच्या तक्रारी महापालिकेकडे गेल्या आहेत. महानगरपालिका दुकानदारांकडून यावर्षी २५० रुपये प्रति चौ. मी. या दराने भाडे आकारले जाणार आहे.