Sahil Khan Arrested In Mahadev Betting App Case: सुमारे 15 हजार कोटी रुपयांच्या प्रसिद्ध महादेव बेटिंग ॲप घोटाळ्यात मुंबई पोलिसांच्या सेंट्रल सायबर सेलच्या एसआयटीने 50 वर्षीय अभिनेता साहिल जाहिद खानला जगदलपूर (छत्तीसगड) येथून अटक केली. मुंबई उच्च न्यायालयाने अटकपूर्व जामीन अर्ज फेटाळल्यानंतर सुमारे 40 तासांनंतर पोलिसांनी साहिलला अटक केली.
त्यानंतर पोलिसांनी त्याला शिंदेवाडी न्यायालयात हजर केले, तेथून त्याला 1 मेपर्यंत पोलीस कोठडी सुनावण्यात आली. साहिलने त्याचा पासपोर्टही न्यायालयात सरेंडर केला आहे. याशिवाय, त्याने महादेव बेटिंग ॲप आणि द लायन बेटिंग ॲपसोबत केलेल्या कराराची आणि बँक स्टेटमेंटची कॉपीही न्यायालयात जमा केली आहे.
दरम्यान, या करारानुसार साहिलला दररोज 3 लाख रुपये मिळणार होते आणि हा करार 22 महिन्यांसाठी होता. डीसीपी दत्ता नलावडे यांच्या नेतृत्वाखाली पीआय मौसमी पाटील या प्रकरणाचा तपास करत आहेत. अटकपूर्व जामीन अर्ज फेटाळताच साहिल मुंबईतून (Mumbai) फरार झाल्याचे सूत्रांनी सांगितले. पोलिस त्याच्या मागावर होते. मात्र साहिल वारंवार त्याचे लोकेशन बदलत होता.
दरम्यान, फरार असताना साहिल खानचा गोवा, आंध्र प्रदेश, कर्नाटक, तेलंगणा आणि छत्तीसगडमध्ये शोध घेण्यात आला. त्याचे गडचिरोली लोकेशनही मिळाले. अखेर जगदलपूर (छत्तीसगड) येथील हॉटेलमधून साहिलला पकडण्यात पोलिसांना यश आले. मात्र, जामीन अर्ज फेटाळण्याआधी आणि फरार होण्यापूर्वी साहिल मुंबई पोलिसांना दररोज सुमारे 3 तास तपासात सहकार्य करत होता.
पोलीस सूत्रांनी दिलेल्या माहितीनुसार, साहिल खान, जो महादेव गेमिंग ॲप नेटवर्कचा एक भाग होता. याशिवाय, तो लायन बुक नावाच्या दुसऱ्या गेमिंग ॲपमध्ये देखील सहभागी असल्याचे आढळून आले आहे. साहिलवर लोटस बुक 24/7 ॲपची जाहिरात केल्याचाही आरोप आहे.
लोटस बुक ॲपचे प्रमोशन केल्यानंतर साहिलने लायन बुक ॲप लाँच केले होते, असे म्हटले जाते. छत्तीसगडचा (Chhattisgarh) रहिवासी असलेल्या साहिलवर कथितरित्या भव्य पार्ट्या आणि सेलिब्रिटींना बोलावून बेटिंग ॲपचा प्रचार केल्याचा आरोप आहे. बेटिंग ॲपचा प्रचार केल्याच्या आरोपाखाली साहिलशिवाय अन्य 31 जणांची चौकशी सुरु आहे.
एसआयटी आता महादेव बेटिंग ॲप आणि काही रिअल इस्टेट कंपन्यांमधील बेकायदेशीर आर्थिक व्यवहारांचीही चौकशी करत आहे. या प्रकरणाशी संबंधित सर्व आरोपींची बँक अकाऊंट, मोबाईल फोन, लॅपटॉप आणि सर्व इलेक्ट्रॉनिक गॅझेटची तपासणी करण्यात येत आहे.
तपास पथकाला गेमिंग ॲप्सशी संबंधित वेबसाइट्सवर अनेक सेलिब्रिटींचे व्हिडिओ मिळाले होते, जे महादेव ॲपची जाहिरात करताना दिसले होते. यामध्ये श्रद्धा कपूर, शक्ती कपूर, बी प्राक, कपिल शर्मा, बोमन इराणी, विवेक ओबेरॉय, कुणाल खेमू, आदित्य रॉय कपूर आणि हुमा कुरेशी यांसारख्या अनेक कलाकारांच्या नावांचा समावेश आहे. मुंबई पोलिसांनी अनेकांची चौकशी केली आहे. याप्रकरणी साहिलशिवाय आणखी एका आरोपीला अटक करण्यात आली आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
