राजेश पाटणेकरांच्या ‘मनपरिवर्तन’ मागचे नाट्य !

डिचोली : उमेदवारीवरून राज्यभरात खल सुरू असताना डिचोलीत मात्र, एक वेगळेच ‘नाटक’ रंगत होते. विद्यमान सभापती तथा भाजपचे आमदार राजेश पाटणेकर यांनी अचानक आपण यंदाची निवडणूक लढविणार नाही, असे जाहीर करून टाकले. हा भाजपला एक वेगळा धक्का होता.

उमेदवारी कोणाला द्यायची हा प्रश्न भाजपश्रेष्ठींना सतावू लागला. माजी आमदार तथा मगोपचे उमेदवार नरेश सावळ यांनाही गळ घालण्यात आली.वास्तविक काही दिवसांपूर्वी सावळ ही भाजपच्या उमेदवारीच्या स्पर्धेत होते. जि. पं. निवडणुकीत तर त्यांनी भाजपला मदतही केली होती. पण ही भाजपची उमेदवारी पाटणेकरांना मिळणार हे निश्चित झाल्यामुळे आपली डाळ तिथे शिजणार नाही, हे सावळांना कळून आले व त्यांनी आपला मोर्चा पुन्हा मगोकडे वळविला. त्याप्रमाणे त्यांनी पक्षातर्फे कार्यही सुरु केले.

आता एवढे पुढे गेल्यावर परत भाजपचा (BJP) उमेदवार म्हणून ‘श्रीगणेशा’ कसा करायचा असे वाटल्यामुळे सावळांनी भाजपची उमेदवारी घेण्यास नकार दिला. त्यानंतर भाजपश्रेष्ठींनी डिचोलीतून अपक्ष म्हणून रिंगणात उतरणाऱ्या डॉ. चंद्रकांत शेट्ये यांनाही गळास लावण्याचा प्रयत्न केला. पण त्यांना आपने पाठिंबा दिल्यामुळे त्यांनीही भाजपशी सोयरीक नाकारली. त्यामुळे भाजपला परत आपली गाडी पाटणेकरांकडेच वळवावी लागली. आणि पाटणेकरांनी हो ना करता करता, शेवटी होकार देऊन टाकला. हे म्हणजे ‘तू मारल्यासारखे कर, मी रडल्यासारखे करतो’ अशातला प्रकार वाटला. पाटणेकर हे तीन वेळा निवडून आले असले तरी त्यांना अजूनपर्यंत मंत्रिपद मिळालेले नाही. यावेळी त्यांना सभापतिपदावरच समाधान मानावे लागले.

यातून राजेश पाटणेकरांनी (Rajesh Patnekar) पक्षातील आपले आसन बळकट केल्याचे दिसते आहे. तरीही त्यांच्या पुढे डिचोलीत अनेक आव्हाने वाढून ठेवली आहेत. मगोपच्या नरेश सावळ, अपक्ष डॉ. चंद्रकात शेट्ये, कॉंग्रेसचे मेघश्याम राऊत बरोबरच शिल्पा नाईक व त्यांचे कार्यकर्ते यांच्याशी पाटणेकरांना सामना करावा लागणार आहे. पाटणेकर हे मतदारांशी चांगला संपर्क ठेवून असलेले नेते म्हणून ओळखले जातात. डिचोलीत पाटणेकरांना भाजपचे ‘हुकमी नाणे’ म्हटले जाते. ते या निवडणुकीत पुन्हा चालते, का हे पाहणे औत्सुक्याचे ठरेल.

निवडणूक न लढवण्याचे ‘नाट्य’ !

मुख्यमंत्री डॉ. प्रमोद सावंत (Pramod Sawant) यांनी पाटणेकरांना पुढच्या मंत्रिमंडळात मंत्रिपद देण्याचे आश्वासन दिले आहे. अर्थात हे आश्वासन जर- तर वर अवलंबून आहे. त्याकरिता भाजपचे सरकार यायला हवे व पाटणेकर डिचोलीतून निवडून यायला हवेत. भाजपातला एक गट माजी जि. पं. सदस्य शिल्पा नाईक यांना उमेदवारी देण्याचा प्रयत्न करीत होता. त्यांचा पाटणेकरांच्या उमेदवारीला विरोध होता. पक्षातील या ‘तू तू मैं मैं ला ’ कंटाळून पाटणेकरांनी निवडणूक न लढविण्याचा निर्णय घेतला असावा, असे सांगितले जाते. पण हे एक राजकीय ‘नाट्य’ च म्हणावे लागेल. हा खुंटा हलवून घट्ट करण्याचा प्रकार वाटतो.