CM Pramod Sawant: ‘राजस्थान सरकार गैरव्यवहारात प्रथम’

CM Pramod Sawant: छत्तीसगडनंतर मुख्यमंत्री डॉ. प्रमोद सावंत यांनी राजस्थानमधील परिवर्तन संकल्प यात्रेत सहभागी होत राजस्थानमधील कॉंग्रेस सरकार कोणत्या बाबतीत देशात पहिले आले अशी विचारणा करत केवळ गैरव्यवहाराच्या मुद्यावर राजस्थान सरकारने प्रथम क्रमांक पटकावल्याचा आरोप केला.

राजस्थानातील भिवडी येथे परिवर्तन संकल्प यात्रेत सहभागी झाल्यानंतर त्यांनी पत्रकार परिषदेत संबोधित केले. मुख्यमंत्री म्हणाले, भ्रष्टाचार आणि कॉंग्रेसचे जवळचे नाते आहे. अशी कृत्ये लपवण्याचा अयशस्वी प्रयत्न गेहलोत सरकार करत आहे.

जलजीवन मोहिमेतील भ्रष्टाचार कॉंग्रेस सरकारला घरचा रस्ता दाखवेल. तेथील एक मंत्री राजेंद्र गुधा यांनी त्यांच्याकडे राजस्थानच्या मुख्यमंत्र्यांच्या बेनामी व्यवहारांची माहिती असलेली डायरी असल्याचे म्हटले होते.

त्याचा संदर्भ घेत डॉ. सावंत यांनी ती लाल डायरी दडवण्याचा गेहलोत यांचा प्रयत्न यशस्वी होणार नाही, असा इशारा दिला.

गेहलोत सरकारला केवळ जाहिरातबाजीने आपली छबी उजळवता येणार नाही असे नमूद करून ते म्हणाले, गेहलोत यांनी राजस्थान कोणत्या क्षेत्रात अग्रेसर आहे ते सांगावे, असेही मुख्यमंत्री म्हणाले.