पैशांपासून ‘आप’ दोन हात दूरच!

मडगाव: आम आदमी पार्टी (AAP) हा स्वच्छ आणि शुचिर्भूत राजकारणावर(Goa Politics) विश्वास ठेवणारा पक्ष असून या पक्षाच्या राजकारणात पैशांच्या राजकारणाला अजिबात थारा नाही, अशी माहिती ‘आप’चे राज्य निमंत्रक राहुल म्हांबरे (Rahul Mhambre) यांनी दिली.

काँग्रेसचे आमदार आलेक्स रेजिनाल्ड यांना ‘आप’मध्ये सामील होण्यासाठी १५ कोटी रुपयांची ऑफर दिली होती, अशी अफवा राजकीय वर्तुळात सध्या पसरली आहे. त्यावर त्यांना विचारले असता, हा थिल्लरपणा आहे. वास्तविक ही अफवा प्रतिक्रिया देण्याइतकीही महत्त्वाची नाही. प्रतिमा कुतिन्हो ज्यावेळी ‘आप’मध्ये सामील झाल्या होत्या, त्यावेळीही अशा अफवा पसरविल्या होत्या. राजकीय विरोधकांना तशी सवयच जडली आहे, असे ते म्हणाले.

आमच्या पक्षात केवळ स्वच्छ प्रतिमेच्या लोकांनाच प्रवेश देत आहोत. आम्हाला गोव्यातील राजकीय घाण दूर करायची आहे. ‘आप’ची पार्श्वभूमी तपासून पाहिल्यास कुणाचाही या अफवेवर विश्वास बसणार नाही, असे म्हांबरे म्हणाले.

गोव्यात परिवर्तन घडवणार : व्हिएगस

‘आप’चे दक्षिण गोव्यातील सक्रिय सदस्य तथा प्रदेश समितीचे उपाध्यक्ष कॅ. व्हेंझी व्हिएगस यांनीही ही केवळ अफवा असून त्यात अजिबात तथ्य नाही, असे सांगितले. आम्ही ‘आप’मध्ये येणाऱ्यांना तुम्हाला येथे काम करण्याचे समाधान मिळणार. तुम्हाला तुमच्या हातातून गोव्यात चांगले परिवर्तन आणल्याचे समाधान मिळणार, एवढेच सांगतो. त्यामुळेच आमच्या पक्षात मोठ्या प्रमाणात लोक सामील होऊ लागले आहेत. गोव्यात परिवर्तन केवळ ‘आप’च आणू शकतो, यावर लोकांचा विश्वास बसू लागला आहे, असे व्हिएगस म्हणाले.