ओल्ड गोव्यातील 'त्या' इमारतीविरोधात सत्याग्रह सुरुच

ओल्ड गोवा : ओल्ड गोव्यातील अनधिकृत बंगल्याविरोधात स्थानिक नागरिकांनी सत्याग्रह सुरुच ठेवला आहे. तब्बल 85 दिवस नागरिकांनी हा सत्याग्रह चालवला आहे. हे अनधिकृत बांधकाम पाडण्याच्या मागणीसाठी सातत्याने पाठपुरावा केला जात आहे, मात्र अजूनही हा बंगला पाडण्यात न आल्याने सत्याग्रह आणखी तीव्र केला आहे. (Protest Against illegal building in old goa News Updates)

ओल्ड गोवा (Old Goa) ग्रामपंचायतीने याआधीच संबंधित बंगल्याच्या मालकाला नोटीस बजावली आहे. हा अनधिकृत बंगला तातडीने पाडण्याचा आदेश पंचायतीने नोटीसीद्वारे दिला आहे. मात्र असं असलं तरीही संबंधित मालकाने हा बंगला अजून तोडलेला नाही. त्यामुळे आक्रमक झालेल्या स्थानिकांनी आपलं आंदोलन (Protest) आणखी जोरात सुरु केलं आहे. दरम्यान स्थानिकांनी आपल्या भूमिकेवर ठाम राहण्याचा निर्णय घेतला आहे.

जोपर्यंत या अनधिकृत इमारतीवर कारवाई होत नाही तोपर्यंत सत्याग्रह सुरुच ठेवण्याचा निर्धार करण्यात आला आहे. तसंच ओल्ड गोव्यातील नागरिकांनी इमारत तोडेपर्यंत साखळी उपोषण सुरुच ठेवणार असल्याचा इशाराही देण्यात आला आहे. त्यामुळे पंचायत आता याप्रकरणात काय भूमिका घेते हे पाहणं महत्त्वाचं ठरणार आहे. या अनधिकृत इमारतीमुळे ओल्ड गोव्यातील हेरिटेजला (Heritage) धोका उत्पन्न झाल्याचा आरोप स्थानिकांनी केला आहे.