यंदा काणकोणात काजू हंगाम समाधानकारक

काणकोण : अवकाळी पावसामुळे लांबलेला काजू हंगाम आता गती घेऊ लागला आहे. यंदा बऱ्यापैकी थंडी पडल्याने यंदा काणकोणात काजूचा हंगाम समाधानकारक असेल, असे विभागीय कृषी अधिकारी कीर्तीराज नाईक गावकर यांनी सांगितले. (Cashew Production in Canacona Goa News Updates)

बदलत्‍या वातावरणामुळे काजू (Cashews) हंगामाला सुमारे पंधरा दिवस विलंब झाला आहे. काणकोणात आताच काही भागात काजू बोंडे धरू लागली आहेत. पहिल्या धारेचे ‘हुर्राक’ तयार होण्यास किमान आणखी पंधरा दिवसांचा कालावधी लागणार आहे. राज्यात काजूबियांचा मोठा खरेदीदार असलेल्या गोवा (Goa) बागायतदार संस्थेने अद्याप दर जाहीर केलेला नाही. काणकोणबरोबरच राज्यातील सर्व काजू बागायती सेंद्रीय असून काजूबियांना चांगला दर मिळण्याची मागणी येथील काजू बागायतदारांनी केली आहे.

89 काजू झोन्स

काणकोण (Canacona) अबकारी कार्यालयाच्या अखत्यारीत एकूण 89 काजू झोन्स आहेत. या झोन्सची पावणी होते. 2 फेब्रुवारीला फक्त सात झोन्‍सची पावणी झाली. उर्वरीत 82 झोन्सची पावणी 2 मार्चला होणार असल्याचे काणकोणचे अबकारी अधीक्षक चंद्रनाथ ऊर्फ शेखर देसाई यांनी सांगितले.