मडगावात प्रियांका गांधीच्या सभेची जय्यत तयारी!

मडगाव : ऐन निवडणुकीच्या काळात गोव्यात काँग्रेसला एक प्रकारची मरगळ आलेली असताना उद्या प्रियांका गांधी या एका दिवसाच्या गोवा भेटीवर येणार असून ही भेट काँग्रेस कार्यकर्त्यांत चैतन्य आणू शकेल का ? सध्या गोव्यातील राजकीय वर्तुळात हाच प्रश्न चर्चेत असून गोव्यातील काँग्रेस कार्यकर्ते या भेटीकडे उत्सुकतेने पाहत आहेत. उद्या प्रियांका गांधी यांची मुख्य सभा आके मडगाव येथील कॉस्ता मैदानावर होणार असून या सभेला किमान 5 हजार लोक उपस्थित राहणार असल्याचे सांगितले जाते. ही सभा काही उमेदवारीच्या इच्छुकांसाठी शक्ती प्रदर्शन करण्याचीही संधी असेल.

उद्या सकाळी प्रियांका गांधी यांचे गोव्यात आगमन झाल्यावर त्या थेट असोलणा येथे जाऊन लोहिया चौकावर हुतात्मा स्मारकाला वंदन करणार असून त्यानंतर कुंकळ्ळी मार्गे त्या मोरपिर्ला येथे जाऊन तिथल्या आदिवासी महिलांची दुखणी ऐकून घेणार आहेत. त्या दुपारचे जेवण तिथेच करतील. त्यांनंतर दुपारी 4 च्या सुमारास मडगावच्या एमसीसी सभागृहात त्या 'मोले वाचवा' या मोहिमेतील मुलांशी चर्चा करणार असून त्यानंतर 5 वाजण्याच्या सुमारास कॉस्ता मैदानावर भरणाऱ्या 'प्रियदर्शनी' या महिला मेळाव्यात भाग घेणार आहेत. तिथून त्या चिखली येथे जाणार असून तिथे होणाऱ्या मेळाव्यात त्यांच्या उपस्थितीत काही कार्यकर्ते काँग्रेस पक्षात प्रवेश करणार आहेत.

प्रियांका गांधी (Priyanka Gandhi) यांच्या सभा ज्या ठिकाणी होणार तिथे काँग्रेसचे झेंडे लावून वातावरण निर्मिती करण्यात आली असून मडगावात (Margao) रस्त्यावरही अशा तरेची वातावरण निर्मिती केली आहे. प्रियांका गांधी यांना झेड प्लस सुरक्षा असल्याने आज केंद्रीय सुरक्षा दलाच्या अधिकाऱ्यांनी सभास्थळांची पाहणी केली. त्यांच्या सभेला स्थानिक पोलिसांचीही कडेकोड सुरक्षा ठेवण्यात येणार असून दक्षिण गोवा पोलीस अधीक्षक स्वतः देखरेख करणार असून मडगाव, फातोर्डा, सांगे आणि केपे या चारही पोलीस स्थानकातील फौजफाटा सभास्थळी तैनात केला जाणार आहे अशी माहिती पोलीस सूत्रांकडून मिळाली.