Vegetables In Goa: राज्यात भाज्यांचे दर समाधानकारक

Vegetables In Goa: राज्यात चतुर्थीपासून भाजीपाल्याचे दर समाधानकारक आहेत. राज्यातील ग्रामीण भागात मोठ्या प्रमाणात पीक घेण्यात येणाऱ्या चिबूड, काकडी, दोडकी, वाली तसेच इतर फळभाज्या, पालेभाज्या बाजारात दाखल होत असून त्यांना चांगली मागणीही आहे.

चिबूड आकाराप्रमाणे 70 ते 150 रुपये दराने विकले जात आहेत. काकडीलादेखील आकाराप्रमाणे दर मिळतोय. इतरही भाज्यांना चांगली मागणी आहे, असे विक्रेते सांगतात. चतुर्थीनंतर आता भाजीपाल्याबरोबर मासळी खरेदीकडे नागरिकांचा कल असल्याने भाजीचे दर कमी आहेत. राज्यात पितृपक्षानिमित्त भाजीपाल्‍याला मोठी मागणी आहे.

ग्रामीण भागात पिकविलेल्या भाज्यांसह नीरफणस, भाजीची केळी, फागला आदींना जास्‍त पसंती दिली जाते. मध्यम आकाराचा नीरफणस 200 रुपये प्रतिनग तर भाजीचे एक केळे २० रुपये दराने विकले जात आहे.

सोबतच आंबाडे, कंदमुळे भाज्यांची मागणीही वाढली आहे. टोमॅटोचा दर आता स्थिर झाला असून ३० रुपये प्रतिकिलो दर आहे तर फलोत्पादन महामंडळाच्या गाळ्यांवर त्‍याचा भाव १५ रुपये इतका आहे. बटाटे, कांदे तसेच इतर भाज्यांचे दरही स्थिर असल्याने ग्राहक समाधान व्यक्त करत आहेत.

शहरांमध्‍ये रानभाज्यांना पसंती

गोव्‍याची राजधानी असलेल्‍या पणजी शहरात तायखिळा, कुड्डूक, फांगला, कोंब, नीरफणस तसेच इतर रानभाज्या विक्रीसाठी येत आहेत. त्यांना चांगली मागणीही आहे. ग्रामीण भागात रानभाज्या मुबलक प्रमाणात उपलब्ध आहेत. त्यामुळे शहरांत भाज्‍यांचे दर वाढले तरी ग्रामीण भागात फारसा परिणाम जाणवत नाही. सध्‍या सर्वत्र रानभाज्या मिळत आहेत.

फलोत्पादन महामंडळाचे भाज्यांचे दर

कांदा ------------------------- ३४

बटाटा -------------------------३०

टोमॅटो -------------------------१५

गाजर --------------------------३१

कोबी --------------------------२२

भेंडी --------------------------- ३५