मडगावातून सांडपाण्यासोबत साळ नदीत मोठ्या प्रमाणात प्लास्टिक

मडगाव : मडगावातून साळ नदीत मोठ्या प्रमाणात केवळ सांडपाणीच जात नाही तर तेवढ्याच प्रमाणात प्लास्टिकही नाले आणि गटारांतून वाहून जात असल्याचे दिसून आले आहे. साळ नदी प्रदूषित होण्याचे तेही एक प्रमुख कारण मानले जात आहे.

मडगाव (Madgaon) नगरपालिका तसेच तिच्या कारभारावर नियंत्रण ठेवून असलेले आमदार तसेच गोवा घनकचरा व्यवस्थापन महामंडळ यांच्यासाठी हे एक आव्हान ठरणार आहे.हे प्लास्टिक केवळ गटारे आणि नाल्यातून वाहून येते असे नाही, तर रात्रीच्या अंधाराचा फायदा घेऊन अनेक जण असा प्लास्टिक कचरा आणून टाकतात. तो नंतर वाहून नदीच्या पात्रात जात असतो.

साळ नदीला समांतर जाणारा वर्तुळाकार रस्ता असा कचरा (Garbage) फेकणाऱ्यांना मदतनीस ठरताना दिसत आहे. कोंब येथील भुयारी मार्ग ते कोलवा रस्त्यापर्यंतच्या भागात दिवाबत्ती नाही आणि त्याच काळोखाचा फायदा घेत मोठ्या प्रमाणात कचरा टाकला जातो. हाच कचरा पावसाच्या पाण्याबरोबर वाहून नदीत (River) जात असतो. जुन्या बाजारांतील कोर्टाकडील नाला हे अशा कचऱ्याचे उदाहरण आहे. पावसात त्यातील प्लास्टिक साळ नदीमध्ये जाण्याची भीती व्यक्त केली जाते.