मडगावात विनापरवाना व्यवसायांवर कारवाई होणार

मडगाव : मडगाव नगरपालिकेकडून अधिकृत परवाना नसताना बेकायदेशीर व्यवसाय करण्याऱ्या व्यवसायिकांच्या कागदपत्रांची पडताळणी करण्यासाठी मडगाव नगरपालिकेचे अधिकारी जाणार आहेत. तपासणीनंतर या विषयी अहवाल दहा दिवसांच्या आत सादर करण्याचे निर्देश नगरपालिकेचे मुख्याधिकारी आग्नेल फर्नांडिस यांनी अधिकाऱ्यांना दिले आहेत.

विनापरवाना आस्थापनांमध्ये पेट्रोलपंप, बँकांची (Bank) एटीएम मशीन्ससाठी भाडेपट्टीवर घेतलेली आस्थापने, शैक्षणिक संस्थांसहित इतर व्यावसायिकांचाही समावेश आहे. या बेकायदेशीर व्यावसायिकांना दहा दिवसांच्या आत कागदपत्रे नगरपालिकेत सादर करावी लागणार आहेत.
यासोबतच भाडे तत्वावर असलेल्या काही दुकानदारांनी साईन बोर्ड, जाहिरातीचा कर, अधिकृत परवाना नसताना आपली आस्थापने खुली ठेवली आहेत. त्यांचाही अहवाल सादर करावा असे निर्देशही नगरपालिकेचे मुख्याधिकारी आग्नेल फर्नांडिस यांनी दिले आहेत.

दरम्यान मडगाव (Madgaon) रेल्वे स्टेशन मार्गावर दुतर्फा फळे, भाजी विक्री करणारे हातगाडेवाले दुकानमालकांना अडथळा ठरत असल्याने ठराविक वेळेसाठी हातगाडे वाल्यांना प्रतिबंध करण्यात आला आहे.
या ठिकाणी रेल्वे (Railway) स्टेशनकडे जाण्याच्या रस्त्यावर सकाळपासून रात्रीपर्यंत मोठ्या संख्येने हातगाडीवाले आपला व्यवसाय करत असतात. त्यामुळे रस्त्याच्या शेजारी असलेल्या दुकानदारांना ग्राहक येण्यास अडथळा निर्माण होत असल्याचं चित्र आहे. त्यामुळे नगरपालिकेने या हातगाडेवाल्यांना दुपारी 1 ते 3 आणि संध्याकाळी 6 ते रात्री 8 पर्यंत हातगाडे लावण्यात प्रतिबंध केला आहे.