राजधानी पणजीतही लवकरच पिंक रिक्षा

पणजी : काही दिवसापूर्वी म्हापसा येथे सुरू करण्यात आलेली पिंक ई-रिक्षा सेवा लवकरच राजधानी पणजीत सुरू होणार आहे. लवकरच पणजीकरांच्या सेवेत पिंक रिक्षा येणार अशी माहिती पणजी रोटरी क्लबचे अध्यक्ष गौरीश धोंड यांनी दिली आहे. (Pink Rickshaws in Panaji)

राज्‍यात महिलांसाठी पिंक ई-रिक्षा सेवा रोटरी क्लबच्या पुढाकाराने पणजी, मडगाव, म्हापसा आणि फोंडा या शहरांमध्ये सुरू केली जाईल. परंतु, काही कारणांमुळे या रिक्षा अजून आमच्यापर्यंत पोहोचलेल्या नाही. येत्‍या आठवड्यात काही पोहोचतील आणि त्‍यानंतर पणजीत सेवा सुरू केली जाईल, असे धोंड यांनी सांगितले.

पिंक ई-रिक्षा सेवेसाठी महिला रिक्षाचालकांचे प्रशिक्षण पूर्ण झाले आहे. एकूण 20 ई-रिक्षा येणार आहेत. प्रत्येक शहरांमध्ये त्यांचे समान वाटप केले जाईल. एका वेळी ट्रकमध्ये आठ रिक्षा आणल्या जातात. परंतु, काही तांत्रिक कारणामुळे विलंब झाला आहे, असे धोंड यांनी सांगितले.

महिला, मुलांसाठी फायदेशीर
पिंक ई-रिक्षा सेवा ही महिला आणि लहान मुलांसाठी असेल. कुटुंब सोबत असल्यास पुरुषांना देखील त्यात बसता येईल. एका ई-रिक्षाची किंमत 3.20 लाख रुपये आहे. पणजीतील विविध ठिकाणी असलेल्या रिक्षा स्टँडवर एक पिंक ई-रिक्षा उभी असेल, असे धोंड यांनी स्पष्ट केले.