Karnataka Election 2023 : मंत्री विश्‍वजीत राणे यांच्या कामगिरीवर पक्षश्रेष्ठी खूष!

आरोग्यमंत्री विश्‍वजीत राणे यांनी कर्नाटक विधानसभा निवडणुकीसाठी तेथेच मुक्काम ठोकून चालविलेले अत्यंत आक्रमक प्रचारकार्य पक्षश्रेष्ठींना पसंत पडले आहे. या निवडणुकीत भाजपला यश मिळाल्यास त्याची मोठी बिदागी त्यांच्या पदरी पडू शकते, असे राजकीय निरीक्षक मानू लागले आहेत.

गृहमंत्री अमित शहा यांच्या सतत संपर्कात असल्याने राणे यांचे राजकीय भविष्य उज्ज्वल असल्याची प्रतिक्रिया त्यांच्या निकटवर्तीयांनी व्यक्त केली. गेले आठ दिवस दररोज अडीचशे ते तीनशे किलोमीटर प्रवास करून विश्‍वजीत राणे यांनी विविध सभांना संबोधित केले आहे.

अंकोला येथे 3 तारखेला पंतप्रधान नरेंद्र मोदी यांची जाहीर सभा होणार असून, 5 मे रोजी गृहमंत्री अमित शहा हल्याळ येथे सभा घेणार आहेत. या दोन्ही महत्त्वाच्या सभांची जबाबदारी विश्‍वजीत राणे यांच्याकडे आहे.

हल्याळच्या सभेसाठी किमान 35 हजार लोक गोळा करण्याची महत्त्वाकांक्षा राणे यांनी बाळगली असून, ते तेथे तहानभूक विसरून काम करीत असल्याचा अहवाल दिल्लीला पोहोचला आहे.

दररोज ३०० किलोमीटर प्रवास

...तर राणेंचे वर्चस्व वाढणार

हल्याळ येथे गेल्या विधानसभा निवडणुकीत भाजपचा उमेदवार केवळ 5 हजार मतांनी पराभूत झाला होता. सध्या कर्नाटकात जरी काँग्रेसच्या बाजूने वारे वाहत असले तरी या जिल्ह्यात भाजपच्या बाजूने वातावरण निर्माण करू शकले तर विश्‍वजीत यांचा राजकीय ग्राफ वाढणार आहे.

पाच आमदार दिमतीला

भाजपच्या सूत्रांनी दिलेल्या माहितीनुसार, गोव्यातील पाच आमदार राणे यांच्या दिमतीला कर्नाटकात पाठविले आहेत. जोशुआ डिसोझा, उल्हास तुयेकर, सुभाष फळदेसाई, दाजी साळकर आणि प्रमेंद्र शेट यांनी तेथे काम सुरू केले असून, ते सर्वजण राणे यांच्या सूचनेनुसार काम करत आहेत.

राणे स्वतः स्वस्थ बसत नाहीत, ते सतत फिरतीवर आहेत आणि तन-मन-धनाने कार्यरत आहेत. राणे यांच्या जाहीर सभांना मिळत असलेला प्रतिसादही दखलपात्र आहे. त्यामुळे त्यांचे नीतिधैर्य निश्‍चित उंचावलेले आहे.