Margao Bandra Express: ‘मडगाव-बांद्रा एक्सप्रेस’ मंदावली! प्रवासी संख्येत घट; थांब्यांवरती विचार करण्याची गरज

पणजी: मुंबईतील वसई, बोरीवली व बांद्रा टर्मिनस या पश्चिम रेल्वे स्थानकांना कोकण रेल्वे मार्गाशी थेट जोडणारी पहिली आणि एकमेव ‘मडगाव–बांद्रा एक्सप्रेस’ सेवा सध्या गंभीर पेचात सापडली आहे. तिचा सरासरी वेग केवळ ३८ ते ४० किमी प्रतितास इतकाच नोंदवला जात आहे. परिणामी, ही सेवा सध्या केवळ ५० ते ७० टक्के प्रवासी क्षमतेने धावत आहे, जे अत्यंत चिंताजनक आहे.

याउलट, मुंबई-गोवा मार्गावरील इतर गाड्यांमध्ये – जसे की ‘कोंकण कन्या’, ‘मांडोवी एक्सप्रेस’, ‘जनशताब्दी’, ‘एलटीटी-मडगाव एक्सप्रेस’ वगैरे – १२० ते १५० टक्क्यांपर्यंत प्रवासी गर्दी नियमितपणे पाहायला मिळते. ही तफावत हे स्पष्ट संकेत देते की, सद्यःस्थितीत मडगाव-बांद्रा एक्सप्रेसची थांबे योजना अपयशी ठरली आहे.

गाडीला फारच मर्यादित थांबे देण्यात आले असून हे थांबे आधीच अनेक सुपरफास्ट व एक्सप्रेस गाड्यांनी व्यापले आहेत. परिणामी, या गाडीने ना दीर्घ प्रवाशांना फायदा होतो, ना स्थानिक प्रवाशांना. विशेष म्हणजे ही गाडी अनेक लहान व उपेक्षित स्थानकांना पूर्णतः डावलते, जे प्रचंड संभाव्य प्रवासी वर्गाच्या संपर्काबाहेर राहते.

ही सेवा हळूहळू निष्प्रभ होत चालली असून, तिच्या माध्यमातून ‘कोंकण–पश्चिम रेल्वे’ जोडणीसारखा ऐतिहासिक टप्पा फोल ठरत आहे. या मार्गावरील अस्सल गरज मध्यवर्ती व तालुकास्तरीय प्रवाशांची आहे, परंतु त्यांच्यावरच दुर्लक्ष केले गेले आहे. या पार्श्वभूमीवर, ‘मडगाव–बांद्रा एक्सप्रेस’ची थांबे योजना १०१०५/१०१०६ दिवा–सावंतवाडी पॅसेंजरप्रमाणे व्यापक व समावेशक करावी, अशी प्रवाशांची मागणी आहे.

ही पॅसेंजर गाडी मध्य रेल्वे व कोकण रेल्वे जोडणारी पहिली सेवा असून, ती स्थानिक स्तरावर प्रचंड लोकप्रिय आहे. अंधेरी, भाईंदर, पेण, नागोठाणे, माणगाव, सापे वामणे, करंजाडी, खेड, सावर्डे, आरवली रोड, संगमेश्वर रोड, आडवली, विलवडे, राजापूर रोड, वैभववाडी रोड, नांदगाव रोड, कुडाळ, झाराप, मडूरे आणि पेडणे या थांब्‍यांचा यांचा समावेश केल्यास प्रवाशांची संख्याही वाढेल व सार्वजनिक गुंतवणुकीचा लाभही प्रत्यक्षात उतरेल असे काही प्रवाशांनी कोकण रेल्वे महामंडळाला कळवले आहे.